(මොරගොල්ලාගම සිසිර කැලේගම)
සැමියාගේ හොර අල්ලන්නට රාජකාරි කරන ස්ථානයේ සිට බිරිය නිවෙසට පැමිණි අතරවාරයේ ඇයට සිදු වු අකරතැබ්බයක් පිළිබදව පුවතක් රජරට පුරවරයට අයත් මහවැලි ජනපද ගම්මානයකින් අසන්නට ලැබුණි.
සිද්ධිය මෙසේය,
දෙදෙනා විවාහක අඹු සැමි යුවළකි.දෙදෙනාම රාජ්‍ය ආයතන දෙකක සේවය කරන්නෝය. ඔවුන් අඩ දබර නොවී සමඟියෙන් වාසය කරන නමුත් ,බිරිය සැමියා කෙරෙහි සැකය හා කුතුහලයෙන් යුතුව පසුවුවාය.
ඇය සේවා ස්ථානය වෙත ගිය නමුත් සැමියා අසනීප ගතියක් නිසා එදින නිවසේ රැදි සිටියේය. එහෙත් සැමියාගේ දුරකතනයට එදින උදේ කාන්තාවකගෙන් පැමිණි දුරකතන ඇමතුමක් නිසා ඇය එදින සැමියා කෙරෙහි දැඩි කුතුහලයකින් පසු වූවාය. ඇය යාබද නිවෙසකට සැමියා කෙරෙහි විමසිල්ලෙන් පසුවන ලෙසට උපදෙස් දී ඇය සේවා ස්ථානයට නික්ම ගියාය.
ඒ අතරවාරයේ යාබද නිවෙසක පණිවිඩකරුගෙන් ඇයට පණිවිඩයක් ලැබුණේ නිවෙසට නාඳුනන කාන්තාවක පැමිණ සිටින බවටය. වහා රාජ්‍ය ආයතනයේ කරමින් සිටි සේවාව පසෙකට තබා ඇය වහ වහා කුලී පදනමට ගත් ත්‍රීරෝද රියකින් නිවෙසට පැමිණියාය. නිවස වසා ඇත.නිවසේ කිසිවෙකුත් නැත.
ඇය සැමියාගේ ජංගම දුරකතනයට පණිවිඩයක් දෙයි.
සැමියා එයට පිළිතුරු දෙමින් දොර ඇරගෙන එළියට එයි.
ඒ අතරවාරයේ නිවසට ආවේ කවුදැයි ඇය විමසුවාය.
රක්ෂණයට බදවා ගන්නට කියා කවුදෝ නෝනෙක් ආවා. අර ගෙදර ඇති ඔහු යාබද නිවසක් පෙන්වා කියා සිටියේය.
ඒ සමඟම ඇයට ඇයගේ සේවා ස්ථානයෙන් පණිවිඩක් ලැබුණි.
විගණන නිලධාරින් පැමිණ සිටිනවා. වහාම එන්න යනුවෙන් ඉන් කියැවුණි. එන පොට වැරදුණ බව දත් ඇය නැවතත් පැමිණි ත්‍රිරෝද රථයෙන්ම ආයතනය කරා පිය මැන්නාය.
ඒ වනවිටත් විගණන නිලධාරිහු ආයතනයෙන් නික්ම ගොස් සිටියහ.
ආයතනයේ සටහන් පොතක ස්ථානයෙන් බැහැර යාම හා ආයතනයේ නොසිටීම සම්බන්ධව ඇයට එරෙහිව රතු පාටින් තිබූ වදන් දැක ඇයට දෙලොව රත්විය.
ඒ වෙනුවෙන් කට උත්තර දීමට ඇයට ආයතනයේ විගණන අංශයට යාමට ද සිදු වී ඇත. සැමියා ගැන නිකරුණේ සැක කිරීමටත්, යාබද නිවසියැන් විශ්වාස කිරිමටත් ගොස් ඇයට සිදු වු අකරතැබ්බය නිසා ඇය දැන් අන්ත අසරණ තත්ත්වයකට පත්ව සිටින්නේලු.
