කරන්දෙණිය එම්. සුසිල් ප්‍රියන්ත
පැරණි සැප එපා කියා අලු‍ත් සැපයක් සොයා ගොස් අලු‍ත් අත්දැකීමකට පළාත් සභා මන්ත්‍රීවරයකුට මුහුණදීමට සිදුවූ අපූරු පුවතක් ගාලු දිසාවේ නගරයකින් වාර්තාවේ.
විවාහක ඔහු සිය නිවෙස ඉදිරිපිට සැමියා විදෙස්ගතව ඇති කාන්තාවකගේ ගෙට රෑට රෑට රිංගුවේ ඇයගේ දුක සැප සොයා බලන්නටය. සැමියා නැති ඇය ඊට විරෝධයක් පළ නොකළේ පුංචි මන්ත්‍රීගේ සොයා බැලීමට ඇය ද එකඟවී සිටි නිසාය.
පුංචි මන්ත්‍රී මේ කාන්තාවගේ නිවෙසට ද රෑට රෑට දුක සැප සොයන්න ගියේ ඇයගේ ද කැමැත්ත ඇතිවය. එසේ යන ඔහු පරණ නිවසට රෑට රෑට නොරිංගුවේ අලු‍ත් නිවසේ කාන්තාවගේ දුක ඔහු හොදින් හඳුනා ගත් නිසාය. ඇයගේ තරුණ කමත් රූපකායත් එයට කදිම හේතු වී තිබිණ.
මේ ගැන දැනගත් පරණ නිවසේ කාන්තාව මේ පුංචි මන්ත්‍රී සමග උරණව සිටියාය. තමාට වාරයක් ආ සැණින් ඔහුගෙන් පළිගැනීමට ඇය මාන බලමින් සිටියාය. ඇය ඒ වෙනුවෙන් නිදී මැරූ වාර අනන්තය.
ඇයගේ වාරය එන්නේ ඔය අතරේදීය. නිදි මැරූ ප්‍රතිඵලය සපල වූ ඇය එදා රෑ ඔහු යාබද නිවසේ කාන්තාවගේ දුක සැප බැලීමට ගෙට රිංගනකම් සිට රතිඤ්ඤා පත්තු කරමින් කෑකෝ ගසමින් ගමේම සෙනඟ පුරවා ගත්තේ යාබද නිවෙසට හොරෙකු පැන්නා යයි කියමිනි.
එම නිවෙස වටකළ ගම්මු නිවසේ දොර ඇරවාගෙන නිවස පරීක්ෂා කිරීමට ගිය අවස්ථාවේ දී එයින් පුංචි මන්ත්‍රී එළියට ආවේ ගැහි ගැහීය. ඒ වනවිට ඔහුගේ භාර්යාව ද එතන සිටියේ ඔහුට උතුර දකුණ අමතක කරවමිනි. ඒ අවස්ථාවේදීම භාර්යාව කාන්තාවගේ නිවෙසට පැන ඇයට තැලු‍වේ පසු දිනම දරුවන් සමග මහ ගෙදරට යන බව පවසමිනි.
