හක්මණ විශේෂ - දෙනගම යසන්ත ආරියසේන
කාන්තා දිනයේ දී අනියම් පෙම්වතියට ලබාදීමට ගත් තෑගි පාර්සලය බිරිඳට හා දරුවන්ට හමුවීම නිසා විශාල අකරතැබ්බයකට මුහුණ දුන් සැමියකු පිළිබඳව දකුණු පළාතේ ග්‍රාමීය ප්‍රදේශයකින් වාර්තා වෙයි.
තරුණ වියේ පසුවන සේවකයා උපතේ සිට මරණය දක්වා ජනතාවට සේවය සැපයෙන ආයතනයක සේවය කරන අතර ස්ථාන මාරුවීමක් ලැබුණත් කෙසේ හෝ එය අවලංගු කර ගැනීමට හැකියාව ඔහු සතුවිය.
දේශපාලන ශක්තිය විදහා දැක්වීමට නිතර උත්සාහ දරන ඔහු රාජකාරියට වඩා කතාවට දක්ෂ පුද්ගලයකු ලෙසට නළුවකු ලෙස හුවා දක්වන අයකු වශයෙන් ද ප්‍රසිද්ධියක්ද උසුලයි.
කාර්යාලයේම සේවය කරන තවත් කාන්තාවක සමග පෙම්හබයක පැටලී සිටී. විවාහකයකු වන මොහුට කුඩා දරුවෝ දෙදෙනෙක්ද සිටිති. කාන්තා දිනයට සිය පෙම්වතියට තෑගී දීම සඳහා අලංකාර සාරිකටුවක් රෝස මලක් සහ කුඩා අත් බෑගයක් මිලදීගෙන අලංකාර ඇසුරුමක අසුරා සිය ගමන් බෑගයේ සුරක්ෂිතව තබාගත්තේය.
සති අන්තයේ දරුමල්ලන් සමග නිවෙසේ කාලය ගතකළ අතර බිරිය ලියාදුන් බඩු ලැයිස්තුව රැගෙන ඒමට ඉරිදා උදේ ඔහු සතිපොළට ගියේය.
කුඩා දරුවන් දෙදෙනා පියාගේ කාමරයට ගොස් සෙල්ලම් කරන අතරතුර වැඩිමල් ළමයා තාත්තාගේ බෑගය වෙනදා මෙන් විවෘත කර බැලු‍වේය. ලස්සන පාර්සලයක් දුටු දරුවෝ දෙදෙනා එය ඔසවාගෙන අම්මා සොයා දිව ගියහ. දරුවන් අත ඇති පාර්සලය දුටු කාන්තාව පුදුමයට පත්ව පාර්සලය විවෘත කර බැලු‍වාය.
ඇසුරුමේ තුළ ඇති දේවල් දුටුවිට ඇයට දෙලොව රත්විය. කාන්තාවකගේ නමක් සඳහන් කරමින් ලියා තිබූ වැකි කිහිපයක් නිසා ඇයගේ කේන්තිය දෙගුණ තෙගුණ වූ අතර පොළට ගොස් පැමිණෙන විට බිරිඳ හා දරුවන් නිවෙසේ පෙනෙන්නට නොසිටි අතර ගමන් මල්ලේ තිබූ පාර්සලයේ කවරය පමණක් කාමරයේ මේසය මත ඇති අයුරු ඔහු දුටුවේය.
දරු දෙදෙනා සමග සිය මහගෙදරට ගිය කාන්තාව සැමියා රැගෙනවිත් තිබූ තෑගිද රැගෙන කාන්තා දිනයේදී ඔහුගේ කාර්යාලයට ගොස් වැකිවල නම සදහන් කාන්තාව සොයා සාරිකටුවක් රෝස මලක් සහ කුඩා අත් බෑගයක් තෑගි කළාය.
රෝස මලට අමතරව දරුදෙදෙනාද බාරගන්නා ලෙස ලු‍ණු ඇඹුල් සහිතව කාන්තාවට ආමන්ත්‍රණය කළ ඇය පිටව යාම නිසා කතාව කාර්යාලය පුරා පැතිරයාමට වැඩි වේලාවක් ගත නොවීය.
සිද්ධිය ආයතන ප්‍රධානියාට වාර්තාවීම නිසා දෙදෙනාට ස්ථාන මාරුවීම් ලැබුණු බවද පැවසේ.
