(මීරිගම විශේෂ පුෂ්පකුමාර මල්ලවආරච්චි)
හදිසියේ ක්ලාන්ත බවට පත්වූ උපකාරක පන්ති ගුරුවරයකු මහ මග අයිනේ තිබූ දන්නා හඳුනන අයකුගේ නිවෙසට නොදන්වාම ඇතුළු වී නිදාගෙන සිටීමෙන් සිදුවන්නට ගිය මහත් අලකලංචියක් අනූ නවයෙන් බේරුණු පුවතක් පුලතිසිපුරය පෙදෙසින් පසුගියදා වාර්තා විය.
ඔහු කාගේත් සිත්ගත් උපකාරක පන්ති ගුරුවරයෙකි.
කලක සිට සිරුරේ සීනි පාලනයට ප්‍රතිකාර ලබාගන්නා ඔහු නිවෙසක පැවති පන්තියක් අවසන් කර එමින් සිටියදී හදිසියේ ක්ලාන්ත බවට පත්වී ඇත්තේ එදින ඔහු මාත්‍රාව ඉක්මවා බෙහෙත් ලබාගෙන තිබීම හේතුවෙනි .
තමන් අසනීප තත්ත්වයෙන් පසුවන බව තේරුම්ගත් මේ ගුරුතුමා මහ මග අයිනේ වූ දන්නා හඳුනන අයකුගේ නිවෙසට ගමන් කර ඇත්තේ රැකවරණය පතා ය. නිවෙසට ගියත් කිසිවකු පෙනෙන්නට නොසිටි හෙයින් ඔහු ඉදිරිපස කාමරයේ ඇඳට වැටුණේ තමන්ගේ දිවි ආරක්ෂා කරගැනීම පිණිසය.
හෝරාවක් පමණ ගත විය. ගුරුතුමන් තරමක් සුවය ලබා ඇත. ඔහු නැගිට දනි පනි ගාද්දී නිවැසි කාන්තාව ඒ හඬ බලන්නට ආවාය. තමන්ගේ නිවෙසේ ඉස්තෝප්පු කාමරයේ පිරිමියකු නිදා සිටිනු දුටු ඇය වික්ෂිප්ත වූවාය.
‘අනේ නෝනා සමාවෙන්න. මට හදිසි අසනීප ගතියක් ඇති වුණා. මම ඇවිල්ලා නිදාගත්තා. කරදරයක් වුණා නම් සමාවෙන්න’යි ඔහු බැගෑපත්ව ඉල්ලා සිටියේ කාන්තාව පුදුමයට මෙන්ම බියට පත්ව සිටින බව දැකීමෙන් පසුවය.
‘අනේ සර් ඒකට නං කමක් නැහැ. මේ අල්ල පනල්ලේ අපේ මහත්තයා ආවනං මොනවා හිතයිද කියලයි මං මේ කල්පනා කළේ’ ඇය කීවාය.
‘මං හීනෙකින්වත් හිතපු දෙයක් නෙමෙයි’ පැවසූ ඔහු නිවෙසින් පිටත්ව යාමට සැරසුණේ කාන්තාවට දැඩි යටහත්පහත් කමක් පාමිනි.
‘මහත්තයා බේත් ගන්නකොට තරමට ගන්න, වැඩිය ගන්න එපා. ආයෙත් අසනීප වුණොත් හැමදාම මෙහෙම ආරක්ෂාව ලැබෙන එකක් නැතැ’යි ඇය කීවේ කට කොනකට ගත් සිනාවක් ඇතිවය.
