සභාවට ආ නිලධාරියා වැහි කබායේ පිහිටෙන් ජාමේ බේරාගෙන


කඹුරුපිටිය විශේෂ කේ. අජිත්.
හදිසි කලබලය හේතුවෙන් මහත් අසීරුතාවට පත් වූ ක්ෂේත්‍ර නිලධාරියකු පිළිබඳ පුවතක් දකුණු පළාතේ ග්‍රාමීය ප්‍රදේශයකින් වාර්තා වේ.


ඔහු සුළු අපනයන භෝග ප්‍රවර්ධනය කිරීම පිළිබඳ ක්ෂේත්‍ර නිලධාරියෙකි.  නිරන්තරයෙන් සෑම කටයුත්තකදීම කලබලයකින් යුතුව ක්‍රියා කිරීම ඔහුගේ ගති ලක්ෂණයකි.  ඔහුගේ බිරිඳද එය දන්නා නිසා, සිය සැමියාගේ කටයුතු කඩිනමින් ඉටු කිරීමට වගබලාගත්තේය. ඇය කොතෙකුත් මෙය තේරුම් කර දුන්න ද  ඔහුගේ කලබලගතිය නිසා වැඩ වරද්දා ගත් වාර ද අනන්තය.  ඒත් ඒ කිසිවකින් ඔහු පාඩමක් ඉගෙන ගත්තේ නැත.


වරක් දෙවරක් නොව කිහිපවාරයක්ම යතුරු පැදියේ බලපත්‍ර රැගෙන නොයාම නිසා පොලීසියට අසු වී කරදරවලටද මුහුණපෑමට සිදුවිය.  තවත් වරෙක හෙල්මටය පැළඳ නොයාම නිසා ද ඔහු දඬුවම් ලැබීය.  එමෙන් සපත්තු නොපැළඳ මේස් පමණක් පැළඳ කාර්යාලයට ගිය වාර ද විය.  


මෙවැනි අකරතැබ්බවලට මුහුණ දුන් මොහු එක් ඉරු දිනක නගරයේ පොළට ගොස් නිවෙසට අවශ්‍ය බඩු ගෙන විත් තබා, කමිසය ගලවා මුහුණ සෝදා ආහාර ගෙන අවසන් වන විට රැස්වීමකට යාමට වේලාව ළං වී තිබුණි.  ඔහු සුපුරුදු පරිදි  ඉතා කලබලයෙන් සූදානම් වී රැස්වීම පැවැති ප්‍රජා ශාලාවට යනවිටත් ප්‍රදේශවාසීහු හා අනෙකුත් නිලධාරීහු ඔහුගේ පැමිණීම අපේක්ෂාවෙන්  සිටියහ. 


කලබලයෙන් පැමිණි ඔහු  යතුරුපැදිය නවතා වැසිකබාය ඉවත් කරන විට උඩ ඇඳුමක් නොමැතිව මේස් බැනියම පිටින් පැමිණ ඇති බව ඔහුට වැටහී ගියේය.  කරකියාගත හැකි කිසිවක් නොවූ ඔහු වැසි කබාය ඉවත් නොකරම කමිසය වෙනුවට කබාය ඇඳගෙන රැස්ව සිටි පිරිස ඇමතුවේය.  


මේ අවස්ථාවේ කබාය ඇඳ සිටීමෙන් ඇති වූ උෂ්ණත්වය නිසා ශරීරයෙන් පිටවූ දහඩිය හේතුවෙන් ඔහු දැඩි අපහසුතාවයට පත් විය. මේ පිළිබඳව අවධානයෙන් සිටි රැස්ව සිටි පිරිස සභාව තුළ කසුකුසු ගෑම නිසා ඔහු තව තවත් අපහසුතාවට පත්විය. මේ නිසාම ඔහු ඉතා කෙටියෙන් දේශනය අවසන් කොට එතැනින් පිට වී ගියේ විදුලි වේගයෙනි.