ඇල්පිටිය - චන්ද්‍රසිරි ගුණසේකර
රාජ්‍ය ආයතනයකට අනුබද්ධ කමිටුවක ප්‍රධාන තනතුරක් ගන්නට යෙදූ උප්පරවැට්ටියක් ගැස්සීයාමෙන් ඔහුට කමිටු සාමාජිකයන්ගේ උසුළු විසුළුවලට ලක්වීමට සිදුවූ පුවතක් දකුණු පළාතෙන් වාර්තා වේ.
එය දකුණු පළාතේ එක්තරා ප්‍රසිද්ධ නගරයකි. එහි පිහිටි රාජ්‍ය ආයතනවල සංවර්ධන කටයුතු කිරීම සඳහා ඒ ඒ ආයතනවලට අනුබද්ධව විවිධ කමිටු පිහිටුවා ගනු ලැබීය. මේ නගරයේ වූ විශ්‍රාමික රාජ්‍ය සේවකයන් දෙදෙනකු මේ සෑම කමිටුවකම විවිධ නිලතල ලබාගත්තේ අනෙක් නගරවාසීන්ට තමන්ගේ ලොකුකම පෙන්වීමටය.
පසුගියදා නගරයේ වූ කාටත් සාමය උදාකරන ආයතනයක එවැනි කමිටුවක් පිහිටුවා ගැනීම සඳහා රැස්වීමක් එම ආයතන රැස්වීම් ශාලාවේදී පැවැත්වීමට කැඳවා තිබුණි. මෙම කමිටුවේ සභාපතිධුරය ලබාගතහොත් අනෙක් කමිටුවල ලබාගත් තනතුරුවලට වඩා සමාජයේ ඉහළින් කැපී පෙනෙන්නට හැකි බව මේ දෙදෙනාම කල්පනා කළහ. මේ සඳහා උප්පරවැට්ටියක් යොදාගැනීමට මින් එක් අයෙක් කල්පනා කළේය. ඒ අනුව ඔහු කළේ තම හිතවතුන් දෙදෙනකුට මේ රැස්වීමට එන ලෙස දන්වා සිටීමය.
‘‘ඔය දෙන්න හරියට තුනට එතනට එන්න. එක්කෙනෙක් මගේ නම සභාපති තනතුරට යෝජනා කරන්න. අනෙක් එක්කෙනා ඒක ස්ථිර කරන්න. මම ඊට පස්සෙ ඔය දෙන්නම කමිටුවෙ සාමාජිකයන් හැටියට දාගන්නම්.’’
නියමිත දින නියමිත වේලාවට රැස්වීම ආරම්භ විය. කමිටුව පිහිටුවා ගැනීමේ අරමුණු හා එහි කටයුතු කෙරෙන ආකාරය පිළිබඳව ආයතන ප්‍රධානියා පැමිණ සිටින අය දැනුවත් කළේය. ඉන් පසු පළමුව ලේකම් ධුරය සඳහා කෙනෙකු යෝජනා කරන ලෙස නිවේදනය කළේය. ඒ සඳහා එහි සිටි විශ්‍රාමික විදුහල්පතිවරයෙක් යෝජනා ස්ථිරත්වයෙන් පත්විය. ඊළඟට සභාපති ධුරය සඳහා නමක් යෝජනා කරන ලෙස නිවේදනය කරනවාත් සමඟම දෙදෙනෙක් නැගී සිට විශ්‍රාමික රාජ්‍ය සේවකයකුගේ නාම යෝජනා කළහ. ඔහු ඒ වනවිට නගරයේ වූ සෑම කමිටුවකම තනතුරු දරන දෙදෙනාගෙන් කෙනෙකි. මේ නිසා අනෙක් පුද්ගලයා තමන්ගේ නම යෝජනා ස්ථිර කිරීමට කැඳවාගෙන ගිය දෙදෙනාට ඊට අවස්ථාවක් ලැබුණේ නැත. ‘දැන් කරන්න දෙයක් නැහැ. සංවිධායක තනතුරට මගේ නම යෝජනා කරනවා’ ඔහු මිතුරන් දෙදෙනාට පැවසීය. එහෙත් අර මිතුරන් දෙදෙනාගෙ නම් කමිටුවට යෝජනා වූයේ නැත.
පසුව සොයා බැලීමේදී දැනගන්නට ලැබී ඇත්තේ සභාපති තනතුරට පත්වූ පුද්ගලයාද තමන්ගේ නම යෝජනා කර ස්ථිර කිරීම සඳහා ඔහුගේ මිතුරන් දෙදෙනකු කැඳවාගෙන පැමිණ ඇති බවය.
අවසානයේ මිතුරන් දෙදෙනා අර විශ්‍රාමික රාජ්‍ය සේවකයාට ‘‘ඔයා කියපුව කරන්න ගිහින් තව පොඩ්ඩෙන් අපට වෙන්නෙ අලියට උදවු කරන්න ගිය වඳුරට වෙච්චි දේ’’ යැයි කියා විහිළු කළහ.
