කාර්යාලයක සේවය කරන ලිපිකරුවා පලතුරු සලාදයක් සෑදූ පුවතක් මෙසේය.
ලිපිකරුවා ආපනශාලාවකට ගොස් උදේ ආහාරයෙන් සප්පායම්වී පිටතට එන විට එහි එල්ලා තිබූ ඉදුණු කෙසෙල් කැනක් දුටුවේය.
කාර්යාලයේ මිතුරන් දෙදෙනාටත් තමාටත් කෙසෙල්ගෙඩි තුනක්ද මොහු මිලයට ගත්තේය. කෙසෙල්ගෙඩි කවරයද කලිසම් සාක්කුවේ දමාගෙන අතේ දෙකට නැවූ කුඩයද ගෙන බසයක් එනතුරා මග බලා සිටියේය.
ඔහුට යා යුතු බස් රථය ඈතින් පැමිණියේය. බසයට අත අල්ලද්දී බසය ඈතට ගොස් නතර වූයේය.
ලිපිකරුවා කලිසම් සාක්කුවට කුඩයද ඔබාගෙන පිම්මේ ගොස් බසයට නැග ගත්තේය.
කාර්යාලය ළඟින් බැසගත් ඔහු ඉක්මණින් කාර්යාලයට ගියේ රතු ඉරට පෙරාතුවය.
ඔහු තම කාමරයට ගොස් මිතුරන් දුටු විට ඔවුනට ගෙන ආ කෙසෙල්ගෙඩි ඔහුට සිහිපත් විය. ඔහු සාක්කුවේ තිබු කුඩය අතට ගෙන සාක්කුවේ අත දැම්මේ කෙසෙල්ගෙඩි මිතුරනට දීමටය.
සාක්කුවේ එකම තලපයකි. කුඩයට හිරවී කෙසෙල්ගෙඩි තලපයක් වී තිබුණේ කලිසම් සාක්කුවම පලතුරු සලාදයක් වෙමිනි. ලිපිකාර මහත්මයා පලතුරු සලාද හැදුවේ එසේය.
(දූනගහ බටේපොල විජයසිරි)
