තමන් ගොනාට අන්දවා කා බී ගානකුත් කඩා ගෙන මාරුවීමට පැමිණි මුහුණු පොතේ සුන්දරියකට අසුන්දර පාඩමක් ඉගැන්වූ අපූරු පුද්ගලයකු පිළිබඳ පුවතක් ගාලු දිසාවේ නගරයකින් අසන්නට ලැබේ.
ඔහු මුහුණු පොතේ සුන්දරියක යාළු කරගත්තේ ඇප් එකක් මාර්ගයෙනි. දෙදෙනා සම්බන්ධකම් පැවැත්වූයේ මුහුණු පොත හරහාය. ඇය සමග කිට්ටු ඇසුරක් පැවැත්වීමට ඔහු දැක්වූයේ නොතිත් ආශාවකි.
මේ නිසාම ඔහු ඇයට ඒ සඳහා ආරාධනා කළේය. මායම් හැටහතරම නොවුණත් එයින් කිහිපයක් දමා බොරු ආඩම්බරකමක් පෙන්වා ඇය ඔහුගේ ආරාධනාව පිළිගත්තේ දිනයක්ද නියම කරමිනි. ඒ අනුව ඇය ඔහු හමුවන්නට ඔහුගේ නගරයට ආවාය.
ඔහු ඇය සමග සිත්සේ සතුටුවීමට නගරයේ හෝටලයක සුවපහසු කාමරයක්ද බලා තිබුණි. බසයෙන් බැස්ස ඇය සමග පාසල් යන වයසේ කොලු ගැටයකුද සිටීම ඔහුගේ ඉහමොළ රත්කරවීමට තරම් වූ කාරණාවක් විය.
මේ මගේ පුතා අද අපේ ඉස්සෙල්ලාම දවසනේ පස්සේ දවසක අපි තනි පංගලමේ හමුවෙමු’’ යයි ඇය කීවේ තමාට අධික බඩගින්නක් පවතින බවද කියමිනි .
‘‘හා එහෙනම් කෑම ටිකක් කමු’’ යයි ඔහු ආරාධනා කළේ නගරයේ හොඳම ආපනශාලාව වෙතට ඇය සහ කොලු ගැටයාද එක්කරගෙන යමිනි. එහිදී තිදෙනාට ඉස්තරම් වර්ගයේ කෑම බීම ජාති ඇනවුම් කිරීමටද ඔහු අමතක නොකළේය. කනබොන අතරේ ඇය ඔහුගෙන් වියදමට රුපියල් තුන්හාරදහසක් ඉල්ලු‍වාය. හා හා ඕක සුලු දෙයක්නේ කී ඔහු කෑම ගත්තට පස්සේ දෙන්නම් යයි ඇයට කීවේ ඇසක් ද ගසමිනි.
ඉක්මණින්ම කෑම කා අවසන් වූ ඔහු අවශ්‍යතාවකට වැසිකිළියට යන බව කියමින් එතැනින් නැගිට ආවේය. හොර පාරෙන්ම පාරට පැන්න ඔහු එතනින් මාරුවී ගියේ මුහුණු පොතේ ඇය සමග පැවැත්වූ සබඳතාවටද ඒ අවස්ථාවේදීම තිත තබමිනි.
කරන්දෙණිය එම්. සුසිල් ප්‍රියන්ත
