තිහගොඩ උපසේන ලියනගම
සිඟමන් යදිමින් සිටි දෑස් නොපෙනෙන යාචකයකුට හදිසියේ පැරණි හිතවතකු මුණගැසීමත් සමඟ අන්ධභාවය අතුරුදන්වීමේ පුවතක් පසුගියදා අසන්නට ලැබුණේ උතුරු මැද පළාතෙනි.
අගනුවර සිට අනුරාධපුරය බලා ධාවනය වූ පෞද්ගලික බස්රථයක් ප්‍රධාන නගරයක නැවැත් වූයේ මගීන්ට තේ පානය සඳහාය.
මේ මොහොතේ එතැනට තම බිරියයැයි සිතිය හැකි වියපත් කාන්තාවගේ උර තලය අල්ලාගෙන ආවේ අන්ධ පුද්ගලයෙකි. ඔහු කළු උපැස් යුවළක්ද පැළඳ සිටියේය. හැකි පමණින් ඔහුට මුදල් නෝට්ටු සහ සිල්ලර කාසිද දැමුවේ මේ යුවළට අනුකම්පාවෙනි.
මොහොතකින් බසයෙන් බැස ආවේ තරබාරු සුදු ඇඳුමින් සැරසුණු මුදු මාල පැළඳි ව්‍යාපාරිකයකුයැයි සිතිය හැකි කෙනෙකි. ඔහු දුටු සැනෙන් අන්ධ යාචකයා ඔහුගේ නමද පවසමින් ‘‘මුදලාලි මේ කොහේද යන්නේ’’යි පැවසුවේ සිනාසෙමිනි.
මවිතයට පත් මුදලාලි යාචකයාගේ ද නම පවසමින් ‘‘යකෝ උඹේ ඇස් අන්ධවුණේ කවදා ඉඳලදැයි’’ අසන විට යාචකයාට කණවැල ඇල්ලූ කාන්තාවට දෙවියන් සිහිවිය.
මොහොතකින් යාචකයාට සිය බොරු අන්ධභාවය මතක් වී පසෙකට ගිය අතර බස් මගීන් කීප දෙනකු අන්ඳමන්ද වී මේ සිදුවීම නැරඹුවත් තවත් සමහරු දැඩි කෝපයෙන් මේ ගැන කතා කළහ.
