(පෝද්දල - සරත් ආනන්ද ගමගේ)
කොරෝනා රෝගය වැළඳුණු පුද්ගලයකු තමාගෙන් ප්‍රතිකාර ලබා ගැනීමට පැමිණ ඇතැයි බියට පත්වූ වෛද්‍යවරයකු ඔහුට ප්‍රතිකාර නොකර එම ස්ථානයෙන් පලාගිය පුවතක් ගාල්ල දිස්ත්‍රික්කයේ ගමකින් වාර්තා වෙයි.
පළමු කොරෝනා රැල්ල ආරම්භ වී දිවයින පුරා ඇඳිරි නීතිය ක්‍රියාත්මක කළ මාර්තු 20 දිනට පෙර දිනක සිදුවූ සිදුවීමකි මේ.
සිද්ධිය මෙසේය.
ප්‍රදේශයේ ලී මෝලක් පවත්වාගෙන යන පුද්ගලයකුට උණ හා සෙම්ප්‍රතිශ්‍යාව වැළඳීම නිසා ප්‍රතිකාර ලබාගැනීමට ප්‍රදේශයේ ජනප්‍රිය වෛද්‍යවරයකු මුණගැසීම සඳහා නිවසින් පිටත් විය. අතරමගදී මුණගැසුණු මිතුරන් පිරිසකටද තමාට වැළඳී ඇති රෝගය ගැන පවසා ප්‍රතිකාර ගැනීමට අසවල් වෛද්‍යවරයා වෙත යන බවත් පවසා තිබේ.
මෙතැන සිටි එක් මිතුරකු ‘නියම වැඩක් කරන්න පුළුවන්’ යැයි පවසා සිය ජංගම දුරකතනයෙන් වෛද්‍යවරයාට ඇමතුමක් ගෙන අසවල් පුද්ගලයා දැන් ඔබතුමා මුණගැසීමට පැමිණෙන බවත් පරෙස්සමෙන් ඔහු පරීක්ෂා කරන ලෙසත් දන්වා ඇත.
‘ඇයි මොකද මිනිහට තියෙන ලෙඩේ?’ යැයි වෛද්‍යවරයා විමසන විට ඔහුට ලැබුණේ මෙවැනි පිළිතුරකි.
‘නැහැ ඩොක්ටර්, මිනිහ ගිය සතියෙ සුද්දො කට්ටියක් එක්ක රට වටේ ටුවර් එකක් ගිහින් ආවේ. දැන් මිනිහට තියෙන ලෙඩ ගැන ඇහුවම අපට නම් සැකයි.’
වැඩි වේලා නොගොස් රෝගියා වෛද්‍යවරයා ඉදිරියේ පෙනී සිටියේය. ඔහු දුටු සැනින් නැඟී සිටි වෛද්‍යවරයා ‘එන්න එපා. එන්න එපා. ඇතුළට එන්න එපා’ යැයි කෑ ගසමින් ඔහුව වළක්වා එළියට පැමිණ ඇත.
රෝගියා එම ස්ථානයෙන් පිටවී වෙනත් වෛද්‍යවරයකු මුණගැසී ප්‍රතිකාර ලබාගෙන නිවෙසට ගොස් ඇත.
වෛද්‍යවරයාගේ මිතුරකු වන ප්‍රාදේශීය සභා මන්ත්‍රීවරයකු සිද්ධිය ලුණු ඇඹුල් දමා ප්‍රචාරය කිරීම නිසා වෛද්‍යවරයා මුහුණ හංගාගෙන සිටින බවද ආරංචියි.
