දිනය 2014.11.01 වේලාව පස්වරු 3.30 ට පමණ කුලියාපිටියේ සිට කුරුණෑගල දක්වා ගමන් ඇරඹූ පෞද්ගලික මගී බස් රථයක් නාරම්මල නගරයට ළඟා වෙමින් තිබූ අතර ඒ වන විට අනෝරා වැසි ඇද හැළෙමින් තිබිණි.

නාරම්මල බණ්ඩාරනායක මාවතේ බස් නැවතුමෙන් බැසීමට සූදානම් වූ මගීන් කීප දෙනෙක් සීනුව නාද කළහ.
මගී ආවරණයක් හෝ තුරු සෙවනක් හෝ නැති එම බස් නැවතුමට මෙහායින් වූ කඩ පේළිය ඉදිරියෙන් මගීන් බැස්සවීමට කාරුණික නොවූ බසයේ රියැදුරු බසය නැවැත්වූයේ කිසිදු ආවරණයක් නැති බස් නැවතුමේය.

බසයෙන් බැසගත් මගීනට සිදුවූයේ අනෝරා වැස්සේ තෙමෙමින් ආවරණයක් සොයා දිව යාමටය.
බසයේ පිටුපස අසුනක සිටි මගියෙක් කොන්දොස්තර අමතා ‘අර පහුවෙච්ච කඩ පේළිය ළඟ බස් එක නැවැත්තුවා නම් අර මගීන්ට වැස්සෙ තෙමි තෙමී දුවන්න වෙන්නෙ නෑනෙ” යි පැවසීය.

‘ඒ වුණාට කඩ පේළිය ළඟ නෙවෙයිනෙ හෝල්ට් එක තියෙන්නෙ” කොන්දොස්තර කීය.
‘හරි ඔය ගොල්ල බස් එකට මගීන් ගන්නෙත් හෝල්ට් එකේදී විතරද?” මගියා පෙරළා ඇසීය.
කොන්දොස්තර ගැටයා එය නොඇසුනාක් මෙන් බසය තුළට වැහි පිනිකඩ ඒම වළකාලීමට බසයේ විවෘතව තිබෙන කවුළුවල වීදුරු පියන්පත් වසන්නට විය.
(කුලියාපිටිය චාමර විමලරත්න)