හඟු‍රන්කෙත – ඒ.ජේ. කරඳගොල්ල
අලු‍ත් අවුරුද්දට සාදමින් සිටි කැවිලිවලට සීනි යැයි සිතා ලු‍ණුදමා එම කැවිලි ආහාරයට නොගෙන ඉවත දැමූ පුවතක් මතුරට ප්‍රදේශයෙන් වාර්තා විය.
වාර්තා වන ආකාරයට සිදුවීම මෙසේය.
මතුරට නගරයට නුදුරු ගමක මිත්තණියක් සිය මුනුපුරන් දෙදෙනාට අලු‍ත් අවුරුද්ද නිමිත්තෙන් රසවත් කැවිලි සෑදීමට සිතා මුංගුලි සෑදීම අරඹා ඇත. ඒ සඳහා සීනි දැමූ බෝතලය ලු‍ණු බෝතලය අසල තබා තිබේ. සිය මිත්තණිය සීනි අඩුවෙන් දමන්නට ඇතැයි සිතා කුඩා මුනුපුරන් දෙදෙනා මිත්තනිය ඉවතට යනතුරු බලාසිට සීනි බෝතලයෙන් අඩක්ම කැවිලි සැකසීමට තිබූ බඳුනට දමා තිබේ.
සේවය නිමවා පැමිණි කුඩා පිරිමි දරු දෙදෙනාගේ පියා මුංගුලියක් කෑවේ තම මව දරු දෙදෙනාට සෑදූ මුංගුලිවල තරම බැලීමටය. වෙනදා ප්‍රණීත මුංගුලි කටේ තියන්න බැරි තරම් ලු‍ණු රස මොකදැයි ඔහු සිය මවගෙන් විමසීය. එහිදී හෙළිවූයේ කැවිලි රස කිරීමට සීනි යැයි සිතා කුඩා දරුවන් දෙදෙනා ලු‍ණු දමා ඇති බවය.
