මැදගම වාර්තාකරු
හොරෙන් පොල් කැඩීමට පාළු ඉඩමකට පැමිණි සොරකු ඉඩම් හිමිකරුගෙන් ප්‍රශ්න කිරීමේ පුවතක් මැදගම ප්‍රදේශයෙන් වාර්තා විය.
සිද්ධිය සැකෙවින් මෙසේය.
එය ප්‍රදේශයේ රජයේ නිලධාරිනියකට අයත් ඉඩමකි. එහි සරුවට පොල් සෑදී තිබුණි. ඔවුහු මෙම ඉඩම සමග පදිංචිව සිටි නිවෙස හැර දමා වසර කිහිපයක් වෙනත් ප්‍රදේශයක පදිංචියට ගොස් සිටියහ.
වසර කිහිපයක සිට මෙම නිවෙසේ පදිංචියට නොපැමිණීම නිසා නිවෙස සමග ඉඩම ද පාළු වී ගොස් කලක් යනවිට මෙම ඉඩම හොරුන්ගේ රාජධානියක් බවට පත්විය.
වසර කිහිපයක් ගත වූ පසුව මෙම ඉඩම විනාශ වී යන බැවින් අඹුදරුවෝ කතාබහ කරගෙන නැවත මෙහි පදිංචියට පැමිණිමට තීරණය කළහ. ඉඩම් හිමිකරු දිනක් නිවෙස සුද්ද පවිත්‍ර කිරීමට පැමිණියේය.
ටික වෙලාවක් වැඩ කරමින් සිටින විට එකවරම ඉඩම දෙසින් පොල් වැටෙන හඬක් ඇසෙන්නට විය. හඬ ඇසෙන දෙසට ගොස් බැලූ විට එක්තරා පුද්ගලයකු පොල් ගසකට නැඟ පොල් කඩන අයුරු දැක ගන්නට ලැබුණි. උරණ වූ ගෙහිමියා ඒ දෙස බලා සිටියත් සොරා කිසිම වෙනසක් නොපෙන්වා දිගටම පොල් කඩමින් සිටියේය.
මොකද ඔය කරන්නේ හිමිකරු කෑගසා ඇසුවේ කේන්තිය ඉහවහා යමිනි.
එවිට සොරා ‘‘ඇයි පේන්නේ නැද්ද පොල් කඩනවා... තමුන් කවුද මගෙන් මොකද කරන්නේ අහන්න” යැයි ගස උඩ සිටම ඇසීය.
සොරා ගසෙන් බිමට බසින තුරු සිටි ගෙහිමියා එම පොල් ගසේම සොරා ගැට ගසා හොඳ හැටි ගුටිබැට දෙමින් තමා කවුදැයි ඔහුට හොඳ හැටි තේරුම් කර දුන්නේ පොලිසියට ද ඇමතුමක් දෙමිනි.
