මොරගොල්ලාගම සිසිර කැලේගම
වසර තිහක් රාජ්‍ය ආයතනයක සේවය කළ සේවකයකු ආයතනයට නිසි වයසේ දී සමුදීම වෙනුවෙන් පැවැති අපූරු උත්සවයක් පිළිබඳව ඇතුගල්පුර පෙදෙසින් අසන්නට ලැබුණි.
ඔහු රටේ විවිධ ප්‍රදේශවලට ගොස් සේවය වෙනුවෙන් කැප වූ සේවකයෙකි.
එලෙස සේවයේ රැඳුණු ඔහුට වසර හැටක් සපිරුණි. සේවයේ තවදුරටත් සිටීමට උත්සාහ කළත් නව චක්‍ර ලේඛවලට අනුව ඔහුට ද සමුදීමට සිදුවුණි.
ඔහුගේ වෙන්වයාමට පෙර ආයතනයේ සහෝදර සේවක පිරිස ඔහු වෙනුවෙන් සාදයක් සංවිධානය කළහ.
අරක්කු බෝතල්, මස්, මාළු ආදී බයිට් වර්ගවලින් එය රසවත් කර තිබුණි.
කවුරුත් එක්ව මත්වතුර තොල ගාමින් ගීත කවි ගායනා කරමින් සිත් සේ විනෝද වුණේ එදින නිවාඩු දිනයක් වූ නිසාය.
විනෝද වෙන අතරේ සමුදෙන්නට සූදානම් වෙන සේවකයා අතීතයේ පැවැති අමනාපකම් ඉස්මතු කරමින් නොරුස්සනා ලෙසට හැසිරෙන්නට විය.
මෙය කාට කාටත් වදයක් වූයෙන් එසේ නොකරන ලෙසටත්, ඒවා අකාමකා සතුටින් ඒ අවස්ථාව සමරන ලෙසටත් බොහෝ අය ඔහුගෙන් ඉල්ලීමක් කළහ.
එහෙත් ඊට අවනත නොවන ඔහුට එක් අයෙකු වසර තිහක් ආයතනයේ කළ මෙහෙවර සිහිපත් කරමින් කනේ පහරක් එල්ල කළේ බලා සිටින්නන් තුෂ්නීම්භූත කරවමින්ය.
කන අත ගගා පැත්තට වුණ ඔහු එතැනින් හික්මුණේ යැයි සිතා සිටිය ද නැවතත් පොලු මුඟුරු රැගෙන යුද්ද ප්‍රකාශයට සැරසුණු නිසා සේවක පිරිසක් ඒවා උදුරාගෙන ඔහු මෙල්ල කර ඇත්තේ රිසිසේ අතපයේ හිරිය මඟ හරිමින්ලු.
අවසානයේ සියල්ලන්ම පාටිය නිමා කර සමු දී යන සේවකයාට ත්‍යාගය දීමට සූදානම්ව ඔහු සෙව්වත් ඔහු ඒ වනවිටත් සියල්ලන්ටම හොරෙන් කිසිවකුටත් නොකියා වෙරිමරගාතේම ආයතනයෙන් පිට වී සිටියේය.
