හක්මන විශේෂ - දෙනගම යසන්ත ආරියසේන
ප්‍රාණ බුක්තිය තබාගෙන දුන් ඉඩමේ ඇති ගසක පොල් කැඩූ පුතාට එරෙහිව පොලිසි ගිය අපූරු පියකු පිළිබඳව කතාවක් දකුණු පළාතේ තොටමුණක් ගැන සඳහන් වන ප්‍රදේශයකින් වාර්තා වේ.
පුතුන් දෙදෙනකු සහ දියණියක ඇති පියා සහ මව මහ ගෙදර ජීවත්වූ අතර එම නිවෙසට දෙපසින් පුත්තු දෙදෙනා නිවාස දෙකක් ඉදිකර පදිංචිව සිටිති. එම පුතුන් දෙදෙනාගෙන් වැඩිමලා නිතර පියා සමග අඬදබර ඇති කරගත්තේය. අනෙකා කලබලයක් නොමැතිව ජීවත් වූයේය. පියා පුතුන් දෙදෙනාට ඉඩමේ කොටස් පවරා ඇත්තේ ප්‍රාණ බුක්තිය තබාගෙනය. මේ අතර පියා මුළු ඉඩමම බුක්ති විඳින බව වාර්තාවේ. පුතා පොල් ගස් කිහිපයක ගෙඩි කඩා ඇති බව දැනගත් පියාට කේන්ති ගියේය. ඔහු ඒ පිළිබඳව පොලීසියට පැමිණිලි කළේය.
පැමිණිල්ල සහ විත්තිය යන දෙපාර්ශ්වය කැඳවා පොලිසිය විමර්ශන කටයුතු සිදුකරන අවස්ථාවේ පියා සහ පුතා පොලිසිය තුළදී ද පොල් ගස සම්බන්ධව ආරවුල් කරන්නට වූහ. තරයේ අවවාද කළ පොලිසිය දෙදෙනාම අධිකරණයට ඉදිරිපත් කරන බව පැවැසීමත් සමග ඔවුන් දෙදෙනාටම දෙලොවම රත්විය. එක් ගසක පොල් කඩා ගැනීමට අවසර දෙන ලෙස පුතා තාත්තාගෙන් ඉල්ලා සිටියද පියා එයට ද එරෙහි වූයේය. පොල් සල්ලිවලට ගන්නා බව පවසමින් තවත් පොල් නොකඩන බවට පුතා පොරොන්දු වූ අතර දෙදෙනාටම පොලීසිය තරයේ අවවාද කර සිද්ධිය සමථයකට පත්කළේය.
පිය-පුතු දෙදෙනා නිවසට ගොස් ටික දිනක් යන විට පොල් ගසේ ආරවුල පිළිබඳ කතාව ගම පුරා පැතිර ගියේය. පියාට බොහෝ දෙනා අප්‍රසාදය පළකිරීම නිසා මව විසින් දින කිහිපයකට වරක් හොර රහසේ පොල් ගෙඩි කිහිපයක් පුතාට ලබාදෙන බවද පැවසේ.
