පරණ බඩු සොයා ගෙවල් ගාන යන තරුණ නඩයකගේ පෙරැත්තයට කේන්ති ගිය ගෙහිමියකු දුන් පරණ බඩුව දැක ඉහ මොළ රත්වීමේ පුවතක් පොතුහැර ප්‍රදේශයෙන් වාර්තා වෙයි.
සිද්ධිය මෙසේය.
ඒ කුරුණෑගල ප්‍රදේශයේ එක්තරා ගමකි. සතියකට දෙතුන් වතාවක් එන පරණ බඩු මිලට ගන්නා ලොරි රථය ශබ්ද නගා ගම වටා යන අතරතුර එක් නිවසක් ළඟ නැවැත් වීය. ගෙදරට පැමිණි පරණ බඩු මුකුත් තියෙනවාදැයි ගෙහිමියාගෙන් දෙදෙනකු විමසුවේ ආයාචනාත්මක ස්වරූපයෙනි. නිවෙස් හිමියා ගෙදර පරණ බඩු මුකුත්ම නැති බව ලොරි රථයෙන් පැමිණි පිරිසට පැවැසීය.
මෙයින් සෑහිමකට පත් නොවු ලොරි රථයෙන් පැමිණි තරුණයෝ ‘‘අනේ අයියේ බලන්නකෝ. පරණ බඩු මොනවත්ම නැද්ද කියලා. අපි සල්ලි හරි අලුත් බඩු හරි දෙන්නම්’’ යනුවෙන් තොරතෝංචියක් නැතිව කියවන්නට පටන් ගත්හ.
මොවුන්ගේ මෙම කන්කෙඳිරියට ගෙහිමියා තරමක් කෝපයට පත්විය.
කෝපයට පත් ගෙහිමියා ‘‘පොඩ්ඩක් ඉන්නවලා’’ කියා ගේතුළ සිටි බිරිඳට අඬ ගැසීය. ඔවුන් ඉදිරියට බිරිඳ පැමිණියායින් පසුව බිරිඳ දෙසට අත දිගුකර ‘‘මේක තමා ගෙදර තියෙන පරණම බඩුව පුළුවන්නම් මේක අරං මට අලුත් බඩුවක් දීලා යනවලා’’ යැයි කීවේය.
ඒ කතාවෙන් ලැජ්ජාවට පත්වූ තරුණ වෙළෙන්දන් මුකුත්ම නොකියා ආපසු යන්නට පිටත් වූයේ මුහුණට මුහුණ බලමිනි.
මෙම කතාවට ගෙහිමියාගේ වත්තේ තණකොළ කපමින් සිටි කොලු ගැටයාට ද ඇසුණේය. එදා සිට මේ ගෙහිමියා හමු වූ විට ‘‘අයියේ පරණ බඩු එහෙම නැද්දැ’’යි අසන්නේ මොහුගෙන් හොඳ වචන ටිකක් අසා ගැනීමට හැකි බව දන්නා නිසාය.
