කටුනායක ටී.කේ.ජී.කපිල
ඇය ගම්පහ ප්‍රධාන පාසලක අනධ්‍යයන කාර්ය මණ්ඩල සේවිකාවකි.
දිනපතා සිය රාජකාරිය සදහා සිය නිවෙසෙහි සිට පාසලට පැමිණියේ ඇය සතු යතුරු පැදියෙනි .
එදින ඇය පාසලට පැමිණෙන විට , පාසල ආරම්භ කිරීමට ආසන්න වී තිබූ බැවින්, ඇය සිය යතුරු පැදිය පාසලේ ප්‍රධාන ගේට්ටුව අසල නවතා, විදුහල්පති කාර්යාලය වෙත දිව ගියේ සිය පැමිණීම සදහා අත්සන යෙදීම සදහාය.
සිය අත්සන යෙදූ ඇය, සිය යතුරු පැදිය පාසල තුළට ගැනීම සදහා ප්‍රධාන ගේට්ටුව අසලට පැමිණි විට ඇය දුටු දසුනින්, ඇයටම උන්හිටිතැන් අමතක විය.
ඒ වනවිටත් ඇයගේ යතුරු පැදිය කිසිවෙකු විසින් රැගෙන ගොස් තිබිණි.
ඇය සුපුරුදු ලෙසින්ම ආදායම් බලපත්‍රය, රක්ෂණ සහතිකය, ඇයගේ රියැදුරු බලපත්‍රය, ඉන්ධන ලබා ගන්නා කිව්.ආර්.කේතය පමණක් නොව එදින සිය යතුරු පැදියේ යතුර ද, එහිම තබා ගොස් තිබුණි.
ඇයට සිය යතුරු පැදිය වෙනුවෙන් කළ හැකි දෙයක් නොවීය. එබැවින් ඇය මේ පිළිබඳව ගම්පහ පොලිසියේ පැමිණිල්ලක් ඉදිරිපත් කිරීමට පියවර ගත්තාය.
කාලය ගෙවී යද්දී සිය යතුරු පැදිය සදහා ඉන්ධන ලබා ගැනීම පිළිබඳ දැනුවත් කිරීමේ කෙටි පණිවිඩ ඇයගේ ජංගම දුරකථනය වෙත වරින්වර ලැබී තිබූ අතර, ඒවා පිළිබඳව ඇය සොයා බැලීමට ද පියවර ගත්තාය.
මේ අතර පාසල්වල දෙවැනි වාරයේ පළමු අදියර සදහා නිවාඩු ලබා දීමට ආසන්න බැවින්, මෙම පාසලේ 06 ශ්‍රේණියේ සිසුන්ගේ පන්ති කව රැස්වීමක් ඉකුත්දා උදෑසන සංවිධානය කර තිබුණි.
මෙම අනධ්‍යයන සේවිකාව සිය යෙහෙළියක සමගින් මේ අතර පාසලේ ප්‍රධාන ගේට්ටුව අසලට පැමිණියේ සිය රාජකාරී අවශ්‍යතාවක් සඳහායි. ඇය දුටු දෙයින් ඇය පුදුමයට පත් වී සිටියාය.
මීට මාසයකට පමණ පෙර මෙම ස්ථානයේදීම නැතිවු යතුරු පැදිය, යළිත් එම ස්ථානයේම යළිත් නවතා තිබේ.
ඇය වහාම මේ පිළිබඳව පාසලේ ආචාර්ය මණ්ඩලය දැනුවත් කර, පන්ති කව රැස්වීමට මෙම යතුරු පැදියෙන් පැමිණි පියා සමග ගම්පහ පොලිසිය වෙත බාර දීමට පියවර ගත්තාය.
