දහවල් කඨින දානයට පන්සලට ගෙන යාමට ඇඹේනිය දුන් බැදපු හුරුල්ලන් මාළුවලට අමුතුම සෙල්ලමක් දැමූ සැමියකුට සැනින් එසැනින් ඒ පව පටිසන් දී නිවසින් යාමට සිදුවූ පුවතක් ගාලු දිසාවේ බල මාළුවට ප්රසිද්ධ නගරයකින් අසන්නට ලැබේ.
සැමියාගේ බේබදුකම ඔවුන්ගේ පවුලේ අගහිඟකම්වල වස්තු බීජය වී තිබිණි. කෙතරම් අගහිඟකම් තිබුණද මහගේ පිනට ලැදිය. ආගමට දහමට කැමතිය. ඒ නිසාම මෙවර සිය විහාරස්ථානයේ කඨින පිංකමේ දහවල් දානයට මිල අඩුවෙන්ම සැකසිය හැකි හුරුල්ලන් මාළු බැදුමක් ඉල්ලා ගත්තාය. ඒ මේ දිනවල හුරුල්ලන් මිල ඉතාම පහතට වැටී තිබූ නිසාය.
ඒ අනුව මහගේ හුරුල්ලන් මාළුව බොහෝම ශ්රද්ධාවෙන් පිළියෙළ කර දුන්නේ එහි සුවඳත් එක්ක දානේ පිඟානක් නොව දෙකක් වැළඳිය හැකි ආකාරයටය. සෑදූ මාළුව තමා ලක ලැහැස්ති වී පන්සලට යෑමට සූදානම් වුවහොත් කඨින දානය ඊළඟ දිනට කල් දාන්නට සිදුවෙන බැවින් ඇය සිය බේබදු සැමියා අත එය යැවීමට කටයුතු කළාය.
ඒ කාර්යය සත්කාර්යයක් සේ ඉටු කළ ඕනා කියාගෙන දහවල නගරයට ගියේ එන දවසේ උදේ කඩයප්පම් තැම්බීමට අවශ්ය අඩුමකුඩුම ටිකක් ගෙන ඒමටය. ඒ යන අතරතුර කඨිනේ දානයේ සියලු කාර්යයන් නිමවී ආපසු එන විහාරස්ථානයේ ප්රධාන දායිකාව ඇයට මුණගැසුණාය. බොහෝම හොඳයි දානයට දෙන්න කියලා හුරුල්ලෝ මාළු බැඳුමක් ලියව ගෙන ඒක නොදුන්නු එක යයි කී විට මහගෙට තරු පෙනුණි. ඇයි අක්කේ මම ගෙදර උන්දෑ අතේ දහවල් හුරුල්ලෝ මාළු ටික එව්වා නේ ඇය කීවාය.
‘‘ඒක කාටවත් ලියන්න දුන්නෙත් නැහැ, අනේ මන්දන්නේ නැහැ උඹලා වගේ මිනිස්සුයි’’ කියමින් ප්රධාන දායිකාව ගතු කීවාය.
ආවේශ වූ මහගේ යන ගමන අතරමග නතර කර නිවසට දිව්වේ අඩියට දෙකටය. ඒ සමග බේබදු සැමියා ගොර ඇද ඇද ඇඳේ නිදා සිටියේය. කෝ මිනිහෝ පන්සලට ගෙනියන්න දුන්නු මාළු ටික යයි කියමින් වෙව්ලන සිරුරෙන් දොර මුල්ලේ තිබූ කොස්ස ගත්තේ දෙක තුනක් තඩි බාන්නය.
ඔහුගේ කටින් වහනය වූ සුපුරුදු ගන්ධයෙන් මාළුවලට සිදු වෙන්නට ඇති දේ ඉවෙන් මෙන් තේරුම් ගත් මහගේ කොසු පහර දෙක තුනක් ඔහුගේ පිට හරහා එල්ල කළේ ගාල කඩාගත් හරකෙකුට දෙන්නා සේය.
ආයෙත් මේ පැත්ත පළාතේ පස් පාගන්නට නාවාට කමක් නැතැයි කියමින් ඇය එළව එළවා ඔහුට කොසු පහර එල්ල කළාලු.
කරන්දෙණිය එම්. සුසිල් ප්රියන්ත