සැමියා උසස් පෙළ විභාගයට පෙනී සිටින තම දරුවා සමත්කර ගැනීමට රූපෙට රූපයක් මෙන් දේවාලෙට දේවාලයක් භාරවීම අසා බිරියට තරු පෙනීමේ සිද්ධියක් රජරට පුරවරයේ මහවැලි කලාපයට අයත් ගම්මානයකින් අසන්නට ලැබුණි.
සිද්ධිය මෙසේය,
මෙවර උසස් පෙළ විභාගයට පෙනී සිටින දරුවන් උදෙසා ප්‍රසිද්ධියක් උසුලන හාස්කම් පවතින දේවාලයකට තම මව්පියන් ගොස් ඇත්තේ දරුවන් වෙනුවෙන් එහි බාරවීම සඳහාය.
විභාගය සඳහා තවත් පෙදෙස්වලින් ද දරුවන් හා ඔවුනගේ පවුල්වල උදවියගෙන් දේවාල භූමිය පිරි ඉතිරී පැවතිණි. පෝලිම අතරින් එක දරුවෙකු බැගින් දේවාලය ඇතුළට ගෙන බාර කරන්නේය.
කපුවා බාරවීමට නියමිත දරුවා වෙනුවෙන් යාතිකා කරන්නෙය.
ඒ අතරවාරයේ මහවැලි ගම් පියසෙන් පිවිසි දරුවන් සඳහා ද වාරය පැමිණියේය.
දරුවා වෙනුවෙන් තම මව්පියෝ බාර වෙති.
එක් මවක නිල් තිරයක් බාර වූවාය. තවත් අයෙක් පළතුරු වට්ටියක් සමඟ විදුලි බල්බ් බාර වුණේය.
මේ අතර තම දරුවා කැටුව ගිය පියා දේවාලය සම්පූර්ණයෙන්ම කඩා අත්තිවාරමේ සිට අලුතින් දේවාලයක් සාදා දීම සඳහා බාර වූයේය.
කපුවා ඒ අසා අන් දරුවන්ට වඩා වැඩි කාලයක් ගෙන එම දරුවා වෙනුවෙන් වඩ වඩාත් යාතිකා කළේය. රැස්ව සිටි පිරිස දෙනෙත් අයාගෙන ඒ දෙස බලා සිටිති.
ඒ සඳහා යන වියදම ලක්ෂ පහකට වැඩි වන බවට රැස්ව සිටි පිරිස කතා වෙති.
සියල්ලෝ බාර වී ගම් බිම් බලා ගියහ.
සැමියා දරුවාට වූ බාරය ගැන ගම්මුන්ගෙන් දැනගත් බිරිඳ වහ වහා නිවසට දිව ආවාය.
‘ඈ මිනිහෝ... බාර වෙන්න යන්නත් මම කුලී වැඩ කරලා හොයා දුන්න සල්ලි අරගෙන ගිය තමුසේ දේවාලය හදලා දෙන්න බාර වුණා කියන්නේ.? අනේ.. මිනිහෝ ගෙදර හදා ගන්න බැරිව, ගේ හරියේ පිච්චියක් නැතිව ඉන්න තමුසේ මොකක් ද මේ වෙච්ච බාරය ?
අනේ අපි ඉතිං මේක කොහොම කරන්න ද ඇය තොරතෝංචියක් නැතිව කියවන්න ට වූවාය.
‘ඒක කරන්නේ මමනේ. කට වහගෙන ඉන්නවාකෝ.’
සැමියා කිසිදු බරක් නැතිව ඊට පිළිතුරු දෙමින් ගෙයින් එළියට බැස්සේය.
මධුවිත තොල ගා ගත් ඔහු සවස් යාමයේ යළි නිවසට ගොඩ වැදුණේය.
බිරිඳ අහස පොළව ගැට ගසන්නට මෙන් වෙච්ච බාරය ගැන බර කල්පනාවකය.
බිරිඳ යළි කියවන්න ට වූවාය. සැමියාට ද යක්ෂයා ආරූඪ විය.
ඔහු තම බිරිද ඇමතුවේය.
‘යෝදියේ මේ අහනවා. දරුවන් පාඩම් කරන්නේ නැතිව දෙවියන්ට පුලුවන් ද දරුවන් පාස් කරවන්න.
අපේ එකාගෙ දක්ෂතාව දන්නේ අපිනේ.
පාස් වෙලා කැම්පස් තේරුණොත් නේ බාරය දෙනවා කියලා මම පඬුරු ගැට ගැහුවේ. දෙවියෝ පිහිට වෙලා කැම්පස් යැව්වොත් ඉඩම විකූණලා පාරට බැහැලා හරි දේවාලය හදනවා. ඒ හින්දා වෙච්ච බාරය ගැන හූල්ලන්නේ නැතිව කට වහගෙන ඉන්නවා’
සැමියාගේ ඒ කතාව ඇසු බිරිඳ ‘ඇත්තනේ’ කියමින් දිගු සුසුමක් හෙලමින් හිසේ තිබුණු බර කන්දරාව බිමින් තැබුවාලු.
(මොරගොල්ලාගම සිසිර කැලේගම)
