බණ්ඩාරගම බිමල් ශ්‍යාමන් ජයසිංහ
‘‘අනේ සර් සල්ලි ටිකෙන් ටික එකතු කරලා රුපියල් 53,000 දීලා දත් ඇන්ඳක් දාගත්තා. මාස පහයි තිබුණේ ඒක කඩල බේසමට වැටුණා සර්, මට සාධාරණයක් කරලා දෙන්න’’ යැයි දත් ඇන්දක් අත්ල මත දරා ගෙන බොරැල්ල පොලිසියේ ස්ථානාධිපති ජනක ප්‍රියදර්ශන විතානගේ මහතාගේ නිල කාමරයට පැමිණි කාන්තාවක හඬා වැටෙමින් පැවසීමේ සිද්ධියක් පොලිසියෙන් වාර්තා වේ.
‘‘සර් මගේ වයස තවම අවුරුදු පනස් අටයි, අපිත් ගැහැනුනේ සර්, මොකද කඩල විකුණුවා කියලා, අපිත් ලස්සනට ඉන්න කැමතියි සර්. මේවා මංකොල්ල කාපු සල්ලි නෙමෙයි. සර් දාඩිය මහන්සියෙන් හම්බ කරගත්ත සල්ලි දීලා තමයි සර් පෙරුම් පුරලා පෙරුම් පුරලා මේ දත් ඇන්ද හදා ගත්තේ....’’ ඇය කියාගෙන කියාගෙන යන්නට වූවාය.
මේ බලන්න සර්, මේ බලන්න මගෙන් 53000 ගත්තා මදිවට මාව යකින්නියක් කරලා. කණ්ණාඩියකින් බලන කොටයි සර් ඒකත් මම දැක්කේ. මගේ තිබුණු දත් ටික උල් කරලා සර් මේ දත් ඇන්ද අටවල තියෙන්නෙ, ඇන දාල නෙමෙයි සර්. මට කරපු අපරාදෙට මුන්ට හෙණ වදින්න ඕනෑ සර් යැයි පවසමින් මුව විවර කර ස්ථානාධිපතිවරයාට පෙන්වීමට කාන්තාව කටයුතු කළාය.
එම කාන්තාව එක දිගට හඬා වැටෙමින් දත් ඇන්දක් පිළිබඳ කියන්නට වූයෙන් මේ කිසිත් අදහාගත නොහැකි වූ ස්ථානාධිපතිවරයා එකින් එක කරුණු විමසීය.
උඩු ඇන්දේ එක දිගට දත් කීපයක් අහිමිවී තිබීම හේතුවෙන් එයින් මතුවන අවලස්සන බව නැති කර ගැනීමට සිත් වූ එම කාන්තාව දන්ත ශල්‍යාගාරයකට ගොස් මීට මාස කීපයකට ඉහත දී මිල ගණන් විමසා ඒ වෙනුවෙන් රුපියල් 53000 ක් වැයවන බව පැවසීමෙන් අනතුරුව නිවෙසට පැමිණ ඇතැයි පොලිසිය කියයි.
රැකියාව වශයෙන් කඩල තම්බා විකිණීමේ ව්‍යාපාරයක් කරන එම කාන්තාව කොතරම් අගහිඟකම් තිබුණත් මුහුණේ පවතින අවලස්සන බව නැති කර ගැනීමට එම මුදල වියදම් කර මීට මාස පහකට ඉහතදී දත් ඇන්ඳ දමාගෙන ඇතැයි පොලිසිය කියයි.
එම කාන්තාව කඩල විකුණමින් සිටිය දී දමන ලද දත් ඇන්ද එක වරම කඩල බේසමට කඩා වැටීමත් සමගම කඩල විකිණීම පසෙකට තබා කඩා වැටුණු දත් ඇන්දත් රැගෙන පොලිසියට පැමිණ මෙම පැමිණිල්ල කර තිබූ බව පොලිස් නිලධාරීයෙක් කීය.
කාන්තාවගේ පැමිණිල්ලට සාවධානව සවන් දුන් බොරැල්ල පොලිසියේ ස්ථානාධිපතිවරයා ඇයගේ පැමිණිල්ල සටහන් කර අදාල දන්ත ශල්‍යාගාරයේ කළමනාකරු ගෙන්වීමට කඩිනමින් කටයුතු කරන ලෙසත් එදිනට කඩා වැටුණු දත් ඇන්ද රැගෙන පැමිණෙන ලෙස ද පැමිණිලිකාරියට දන්වන ලෙසත් පොලිස් කාන්තාවකට උපදෙස් දුන්නේය.
