(රාජාංගණය - නුවන් කුමාර)
ඉක්මනින් අරක්කු බෝතලයක් බී වාර්තාවක් තැබීමට සූදානම් වූ තරුණයකුට තම ජීවිතයෙන් වන්දි ගෙවීමට සිදුවීමේ පුවතක් ආරංචිවෙයි.
සිද්ධියේ කතානායක වන තරුණයා අවුරුදු 23ක් පමණ වයසැති දක්ෂ වඩු කාර්මිකයෙකි. මොහුගේ දක්ෂතාව නිසාම තම ගම්මානයේ පමණක් නොව දුර බැහැර ප්රදේශවල වැසියන් ද තමතමන්ගේ නිවෙස්වල වඩුවැඩ කරගැනීමට මෙම තරුණයාට ආරාධනා කිරීම සාමාන්ය දෙයකි.
බොහෝවිට ඔහු වඩුවැඩවල යෙදෙන්නේ කොන්ත්රාත් ක්රමයටය. ඒ නිසාම ඔහුට ගෝලයෝ පිරිසක්ද සිටිති.
කොපමණ දක්ෂ වඩු කාර්මිකයෙකු වුවද ඔහු ඇතුළු ගෝලයින්ගෙන් කොටසක් දැඩි ලෙස මත්ද්රව්යවලට ඇබ්බැහි වී සිට ඇත.
කොරෝනා වසංගතය රටපුරා ව්යාප්තවීම හේතුවෙන් රජය විසින් ඇඳිරි නීතිය පැනවූ සමයේදී සුරාසල් වසාදමා තිබූ නිසා බොහෝ විට මොවුන් ඇතුළු පිරිසට මත්ද්රව්ය ලබාගැනීමට බාධා පැමිණ තිබුණි..
ඇදිරිනීතිය මදක් ලිහිල්කර සුරාසල් විවෘත කිරීමත් සමග අප්රමාණ සතුටක් මියගිය පුද්ගලයාට හා ඔහුගේ මිතුරන්ට දැනෙන්නට විය.
නොච්චියාගම ප්රදේශයේ නිවසක වහලයක් ගැසීමට ඔවුනට ආරාධනා ලැබෙන්නේ පසුගිය සතියේය. වැඩ අවසන් කර අරක්කු බෝතල් කිහිපයක් මිලදී ගත් පිරිස ඒවා එකින් එක හිස්කරමින් සිටින අතරතුර අපේ කතානායකයාට අපූරු අදහසක් පහළ වී තිබේ.
තමා මීට පෙර තත්පර 45ක් ඇතුළත අරක්කු බෝතලය කටේ තබාගෙන පානය කොට තැබූ වාර්තාව තමා විසින්ම බිඳහෙළන බවට පුරසාරම් දොඩා මෙවරත් අරක්කු බෝතලය කටේ තබාගෙන පානය කිරීමට සූදානම් වූ විට අරක්කු පිට උගුරේ ගොස් දැඩි ලෙස අසාධ්යවී ඇත. මිතුරන් විසින් ඔහු රෝහල් ගත කරනු ලැබුවද අවාසනාවකට ඔහුගේ ජීවිතය බේරාගැනීමට නොහැකි වී තිබේ.
