කරන්දෙණිය එම්.සුසිල් පියන්ත සහ ඇත්කඳුර ජනක් ද සිල්වා
අග නගරයේ කර්මාන්ත ශාලාවක් නැරඹීමට අවසර ලබා දෙන්නේ යැයි කියමින් මුළු පාසලක් හා මගී ප්රවාහන බස් රථ තුනක රියැදුරන්ද අන්දවා සෑහෙන ගානක් කඩාගෙන ගිය නාදුනන්නකු පිළිබඳ පුවතක් දකුණු පළාතෙන් අසන්නට ලැබේ.
වැදගතකු යයි කෙනකුට හැඟෙන අයුරින් හොඳට ඇඳ පැළඳගත් අයෙක් විදුහල්පතිවරයා මුණගැසීමට පැමිණියේය. ඒ පාසලේ පහළ පන්තිවල සිසුන් කර්මාන්ත ශාලාවක් නැරඹීමට කතිකාවක් ගොඩනැගී තිබූ අවස්ථාවකය.
තමා අසවල් ආයතනයේ අසවලා යැයි ඔහු පාසලට හඳුන්වා දුන්නේය. සිය කර්මාන්ත ශාලාව නැරඹීම සඳහා තමාට අවසර ලබාගත හැකි යැයි පාසලට ඔහු කීවේ එය ඇත්ත යැයි පිළිගත හැකි සාක්ෂිද ඕනෑවටත් වඩා පෙන්වා දෙමිනි.
ඒ සඳහා විදුහලෙන් ලිපියක්ද ඔහු නැරඹීමට යන ආයතනය සඳහා ලබාගත්තේය. ඒ විතරක්ම නොවේ පාසල් සිසුන් රැගෙන යාමට සූදානම් කර තිබූ බස් රථ තුනක අංක සඳහන් කරමින් අදාළ බස් ඩිපෝවටද ලිපියක් ගත්තේය. ඒ බස් රථ සඳහා ඉන්ධන ලබාගැනීම සඳහාය.
මේ සියලු ලියකියවිලි ගත් මේ තැනැත්තා ඊට පසු ගියේ ලිපියේ අංක සඳහන් බස් රථ තුනේ රියැදුරන් හමුවීමටය. පාසල් සිසුන් රැගෙන යාමට බස් රථ තුනට අවශ්ය තෙල් බස් ඩිපෝවෙන් ගසා ගැනීමට නම් අත්තිකාරම් මුදලක් ඩිපෝවට බැඳිය යුතු බව එහි රියැදුරන්ට ඔහු කීවේය.
පෝලිමේ නොසිට තෙල් ටිකක් බස් එකට ගැසීමේ අවස්ථාවක් උදාවී ඇතැයි සිතූ බස් රථ තුනේ රියැදුරන් ඔහුට ලෝස් නැතිව මොනර කොළ ලබාදී ඇත්තේ යන්න තියෙන පාසල් සිසු හයර් එක ගැනද සිහිපත් කරමිනි.
පාසල් සිසුන් යාමට කතිකා කරගත් දිනය ආසන්න වෙද්දී බස් රථවලට ඉන්ධන ලබාගැනීමට අත්තිකාරම් මුදල් ලබාගත් ඔහු ගැන සොයා බැලුවත්, කිසිදු හෝඩුවාවක් නොවිණි. අන්තිමේදී සිසු චාරිකාව ද අත්හැරියේ එම ආයතනයට කතා කරද්දී එවැන්නක් ගැන එහි වගකිවයුත්තන් කිසිම දෙයක් නොදන්නා බව පැවසීම නිසා ය.
