කරන්දෙණිය එම්.සුසිල් පියන්ත
මිතුරන් පිරිසක් සමග ඡන්දය අහන්න ගොස් සෙට්වී නිවසට යාමට නොහැකිවූ අයකු පිළිබඳව කතාවක් ගාලු දිසාවේ ගමකින් ඊයේ (15) උදේ පාන්දරින්ම අසන්න ලැබුණේය.
යාබද නිවෙස්වල සිටි ඔවුහු එක්වූයේ මහ මැතිවරණ ප්‍රතිථල අසා ගැනීමය. ඊට නිදි දෙව්දුව දුරස් කිරීමටත් ඒ සඳහා උත්තේජකයක් ලබා ගැනීමත් මෙහි තවත් අනු අරමුණක් විය.
ෂොට් එකක් දාගත් ඔහු කෙටි නින්දකට වැටුණේය. ඒ වාඩිවී සිටි පුටුවේමය. බෝතලය හිස්වූයේ විනාඩියට දෙකටය. තවත් ඔවුනට වුවමනාවිය. ළඟ සල්ලිද නොවීය. බාර් වසා ඇති හෙයින් බඩු ගත හැක්කේ වැඩි මිලටය. කරන්න කිසිම දෙයක් නොවිය. එකකු අනෙක් අයගේ කනට කර අලු‍ත් අදහසක් දැම්මේය. වෙනත් විකල්පයක් නොවූ තැන ඔවුහු ඊට කැමතිවූහ.
කොහොමින් හරි ඔවුහු තවත් බෝතලයක් ගෙන ආහ. අර මිතුරා තවම නින්දේය. පුටුව උඩමය. අනෙක් අය ඔහු කූද්දා ෂොට් එකක් දෙකක් දුන්නෝය. ඔහුත් නිදි මරගාතේම එය ඇරලා දැම්මේය. වැඩේ නැගලා යමින් තිබිණ.
නින්දේ සිටි මිතුරාට නිවසට යාමට අවශ්‍ය වූවේය. ඔහු දනිපනිගා නැගිට්ටේ නිවසට යාමටය. කමීසයේ සාක්කුව බැලු‍වේ නිකමටය. දෙයියනේ සාක්කුවේ තිබුණු මොනරු තමාටත් නොදැනීම ඉගිල්ලිලාය. ඔහුට හීන් දහඩිය දැම්මේය. මේ පිළිබඳ ඔහු මිතුරන්ගෙන් ඇසුවේය.
මචං අපිට මදිවුණා. කරන්න කිසිම දෙයක් තිබුණේ නැහැ. අපි ඉතිං උඹේ කමීස සාක්කුවෙන් සල්ලි අරගෙන තව බෝතලයක් අරන් ආවා. කමක් නැහැනේ. උඹත් බිව්වානේ යයි මිතුරන් කීවිට ඔහුට මැවි මැවී පෙනුණේ සිය භාර්යාවගේ රකුසු මුහුණය. නිවසට උදේට ගේන්න තියෙන බඩු ලයිස්තුවය. ඒ සඳහා ඔහු උදේට ඇයට දැන් මුදල් ලබාදෙන්නේ කෙසේද යන්නය. දැනි ඉතිං නිවසට ගොස් හමාරය.
කාගෙන් හෝ අත මාරුවක් අරගෙන උදේ පාන්දරම ගෙදර යන්නේ යයි සිතමින් ඔහු තමාගෙන් ගත් මුදලින් ගෙනා බෝතලයෙන් තවත් ෂොට් කිහිපයක් ගෙන පුටුව උඩම නිදාගත්තේ වෙනත් කරන්න දෙයක් නැති නිසාලු.
