කරන්දෙණිය එම්.සුසිල් ප්‍රියන්ත
ලාබාළ තරුණියකගේ පහස විඳ ගැනීමට ගිය අම්බලන්ගොඩ ව්‍යාපාරියකුට වූ අලකලංචියක් අම්බලන්ගොඩ පොලීසියෙන් අසන්නට ලැබේ.
ඔහු මාළු ව්‍යාපාරිකයෙකි. ගැටවරියන්ට ඔහු දැක්වූයේ දැඩි කැමැත්තකි. මේ තරුණිය ගැන දැන ගන්නට ලැබුණේ මිතුරකු මාර්ගයෙනි. ඇයගේ දුරකතන අංකයද ලැබිණ. තමා අසවලා යැයි හඳුන්වා දෙමින් ඔහු ඇය මුණ ගැසීමට වුවමනා බව දැනුම් දුන්නේය.
තැන, වේලාව, දුරකතනයෙන්ම ඔවුහු කතා කර ගත්හ. ඒ අනුව සියල්ල සූදානම්ය.
ව්‍යාපාරිකයා අදාළ ස්ථානයට එන විටත් තරුණිය කාමරයේ සිටියාය. දොරට තට්ටු කෙරිණ. දොර ඇරිණ. ලාබාළ තරුණිය දුටු සැණින් ඔහුට උන්හිටි තැන් අමතක විය. ඇය බදා ගන්නට පැන්නේ එහෙයිනි. ඒ එක්කම ඇඳ යටින් මතුවූවේ පිහියක් අමෝරගත් යක්ෂයෙ වන් කළු කොල්ලෙකි.
’’අද මම තොපි දෙන්නාම කම්බස් කරනවා... මේ හොරේ අල්ල ගන්න තමයි මමත් හිටියේ....” කියමින් කොල්ලා ව්‍යාපාරිකයාගේ කමීස කොලරයෙන් අල්ලා ගත්තේය. අනේ මල්ලී එහෙම කරන්න එපා... මම ඉල්ලන ගාණක් දෙන්නම්... මට යන්න දෙන්න... යැයි කියමින් ඔහු කොල්ලාට බැගෑපත්වූයේය.
පේන්නත් එක්කම කමිසයේ උඩ සාක්කුවේ දමාගෙන සිටි මොනර කොළ තිහ හතළිහක්ම කොල්ලාට දී ඔහු මාරුවී ගියේය.
මේ මුදලින් කෙල්ලත්, කොල්ලාත් එකට එකතුවී කුඩු ගසමින් දින කිහිපයක්ම සුදියේ ගත කළහ. පවුල් ආරවුලක් සම්බන්ධයෙන් මොවුන් දෙදෙනා පොලීසියට ගෙන ආ අවස්ථාවේදී තරුණිය ඔවුන් දෙදෙනා සමග එකට එකතුවී අම්බලන්ගොඩ ව්‍යාපාරිකයාට දුන් මේ අපූරු ගේම වැමෑරුවේ පොලීසියද නම කියූ සැණින් ඔහු හඳුනා ගනිමිනි.
