ආයතනයකට ගිය පුද්ගලයකු උෂ්ණත්වය පරික්ෂා කිරීමට යාමේදී බිය වී පැන දිවූ පුවතක් ගම්බද ප්‍රදේශයකින් වාර්තා වේ.
ඔහු ගමේ මිල මුදල් ඇති ඉතා මසුරුකමින් කල් ගෙවන පුද්ගලයකි. තනිකඩයකු වන ඔහු වැඩිය සමාජ ඇසුරට නොයන්නේ ආධාර උපකාර කිරීමට සිදුවන නිසාය. ඔහු නිවසින් බැහැර වන අවස්ථාවේදී තමා සතු සියලු‍ම වටිනා දේවල් රැගෙන යන අතර ගෙදර තිබෙන කුඩා රේඩියෝ යන්ත්‍රයද රැගෙන යන්නේ තමා ගෙදර නැති විට සොරුන් එය රැගෙන යාවියයි බියෙනි.
මෙම සිදුවීම සිදු වූ දින ඔහු සකල කළමනා රැගෙන නිවසින් පිටව ඇත්තේ නගරයේ ආයතනයකින් තමාට සිදුකර ගැනීමට තිබූ වැඩකට යාමටය. ඔහු බස් රියෙන් බැස එම ආයතනය වෙත ගිය අතර මුහුණ වසාගත් හොඳින් සැරසුණු පුද්ගලයකු අතේ තිබූ පිස්තෝලයක් වැනි යමක් තම නළල දෙසට යොමු කරනවාත් සමග කලබල වූ ඔහු පණ එපා කියමින් පැන දුව ඇත්තේ තමාව මංකොල්ල කෑමට එම තරුණයා උත්සාහ කළ බව සිතාය. අන්දුන් කුන්දුන් වූ එම ආයතනයේ ආරක්ෂක නිලධාරීයා ඔහු දිවයන මග බලා සිට ඇත්තේ සිදුවූ දෙය තේරුම් ගැනීමට නොහැකිවය. ඔහු දිව යන මග සිටි පුද්ගලයකු ඔහු නවතා ‘‘මොකද අන්කල් දුවන්නේ ප්‍රශ්නයක්ද”යැයි අසා ඇත.
එවිට එම පුද්ගලයාට කාරණය පවසා ඔහුත් සමග අදාළ ආරක්ෂක නිලධාරීවරයා ළඟට ගිය පසුව ඔහු පැන ගිය හේතුව දැන ‘‘අන්කල් මේක උෂ්ණත්වය බලන එකක්. මේ දවස්වල හැම ආයතනයකම මේක කරනවා”යැයි ඔහුට තේරුම් කර දී ඇත. එම ස්ථානයේ සිටි සියලු‍ම දෙනා සිනාසෙද්දී ඔහු ලැජ්ජාවෙන් තමා ආ කාර්යය සිදුකර ගැනීමට කාර්යාලය වෙත ගොස් තිබේ.
(කලවාන උපේන්ද්‍ර ප්‍රියංකර ජාතුංගම)
