වියලු‍ව වාර්තාකරු
සාමාන්‍ය උසස් වීමක් ලබා වෙනත් ආයතනයක සේවයට වාර්තා කළ රජයේ සේවකයකු අදාළ තනතුරින් හිස උදුම්මාගෙන විධායක නිලධාරීන් හා සමව කටයුතු කරන්නට ගොස් එම ආයතනයේම පහළ සේවකයන්ගේ සමච්චලයට ලක් වූ බව කියැවෙන පුවතකි.
සිද්ධිය මෙසේය.
ඔහු රජයේ සාමාන්‍ය රැකියාවක නිරතව සිටින්නෙකි. පසුගිය දා ඔහුට රැකියාවේ යම් උසස් වීමක් ලැබිණි. ඔහුට පැවරී තිබුණේ තමාගේම ශ්‍රේණියේ කනිෂ්ඨ නිලධාරීන් පිළිබඳ සොයා බලා ඔවුන්ගේ පරිපාලන කටයුතු සම්බන්ධීකරණය කිරීමය.
උසස්වීමක් ලද පසු වත්මන් සේවා ස්ථානයෙන් වෙනත් සේවා ස්ථානයකට මාරුකර යැවීම රජයේ සාමාන්‍ය ක්‍රියා පටිපාටිය අනුව ඔහුට සේවය කළ ආයතනයෙන් බැහැර වෙනත් සේවා ස්ථානයක රැකියාවට වාර්තා කිරීමට සිදු විය.
ඔහුට පෙර එම තනතුර දැරූ නිලධාරියාගේ කාමරයම ඔහුගේ තනතුරට ගැළපෙන පරිදි සූදානම් කර තිබිණි. මේසයක්, පුටුවක් ආදී අවම මූලික පහසුකම් ද ඔහුට ලැබිණි.
නව තනතුරින් ඒ වන විටත් හිස උදුම්මාගෙන සිටි ඔහුට සිය මේසය මත යම් කිසි අඩුවක් ඇතැයි හැඟුනි.
ආයතනයේ විධායක නිලධාරීන්ගේ මේසය මත ඇති සේවකයන් කැඳවන සීනුවක් තම මේසය මත නැති බව ඔහුට පෙනුණි.
ඒ පිළිබඳ ඔහු කාර්යාල කාර්ය සහයකයකුගෙන් විමසීමේදී ඔහු කියා සිටියේ ‘‘කලින් හිටිය මහත්තයා නම් එහෙම එකක් පාවිච්චි කළේ නැහැ’’ යනුවෙනි. ‘‘නෑ නෑ එහෙම එකක් තිබෙන්න ඕනි’’ යැයි පැවසූ හෙතෙම පසුදා සේවයට පැමිණෙන විට ඔහුගේ මුදලින්ම සීනුවක් රැගෙන විත් මේසය මත තැබුවේ රාජකාරි කිරීමට නම් එය අත්‍යවශ්‍ය අංගයක් බව එහි සිටි කීපදෙනකුටම පවසමිනි.
දවස ඇරඹී හෝරාවක් දෙකක් ගත වෙද්දී විටින් විට ඔහු සීනුව නාද කරමින් පහළ සේවකයන් කැඳවන්නට වූවේ එය ආයතනයේ සෙසු නිලධාරීන්ටද හිරිහැරයක් වන පරිද්දෙනි.
ඔහුගේ සීනු නාදයට මුලින් මුලින් සේවකයන් කීප දෙනකු ඔහුගේ කාමරය තුළට ගියද, පසුව ඔවුන් එය අත්හැර දැම්මේ එය මහත් කරදරයක් බව පවසමිනි. දිනක් දෙකක් සීනු නාදය ඉවසූ එහි සිටි කටකාර සේවකයකු කියා සිටියේ ‘‘මහත්තයා සීනුව ගහන්න අයිති ලොකු සර්ට විතරයි. ඔයා සීනුව ගහද්දි නම් අපි එන්නේ නෑ. ඔයාට ඕන නම් ඇවිල්ලා වැඩ කරගන්න. කලින් මහත්තයත් කළේ එහෙමයි’’ යනුවෙනි.
ඒ වන විටත් ඔහුගේ මෙම සීනු සෙල්ලම ආයතනයේ සෙසු සේවකයෙන්ගේද, ඉහළ නිලධාරීන්ගේද කතා බහට ලක්වී ඇති බව ඔහුටද කොනින් ආරංචි වී තිබිණි. හෙමින් සීරුවේ ඔහු සීනුව සිය ගමන් මල්ලේ ඔබාගෙන ඇත්තේ තව දුරටත් සීනුව නාද කළ හොත් ආයතනය තුළ තමුන්ට අත්වන ඉරණම ගැන ඉවෙන් මෙන් අවබෝධවූ හෙයිනි
