වියලු‍ව වාර්තාකරු
යාබද ඉඩමේ වැට මායිමට සිටුවා ඇති ඇල්බීසියා ගස්වලින් තම ඉඩමට හිරු එළිය නොවැටෙන්නේ යැයි පවසමින් එම මායිම් වැට මුලින්ම කපා දර වෙළෙන්දකුට අලෙවි කිරීමට තැත්කළ පුද්ගලයෙකු පිළිබඳ පුවතක් කන්දකැටිය පොලිසියෙන් වාර්තාවේ.
සිද්ධිය මෙසේ ය.
ඔවුහු යාබද ඉඩම්වල පදිංචිකරුවෝ වූහ. එක් ඉඩමක හිමිකරුවෙක් මායිම් වැටට හිමිකම් කීවේය.
වැට මායිම් කර තිබුණේ සිටුවන ලද ඇල්බීසියා ගස් පෙළකිනි. කලක් තිස්සේ වැට නොකැපීම හේතුවෙන් එහි ඇල්බීසියා ගස් ඉතා සරුවට මෙන්ම මහතට වැඩී තිබිණි.
මේ දිනවල ප්‍රදේශයේ පිහිටි දර විදුලි බලාගාරයකින් ඇල්බීසියා දරවලට තිබෙන්නේ ඉහළ ඉල්ලු‍මක් බැවින් යාබදව පදිංචි අනෙක් ඉඩම් හිමියා හොඳින් වැඩුණු ඇල්බීසියා ගස් පෙළ දෙස බලා හිටියේ දැඩි කෑදරකමකිනි.
වැට අයත් ඉඩම් හිමියා වෙනත් ප්‍රදේශයක පදිංචිව සිටින බැවින් කිසිවක් නොවිමසූ යාබද ඉඩම් හිමියා වැටේ කොටසක් කපා එම දර අට්ටි ගසන්නට වූයේ වැඩි මිලට විකුණා කීයක් හෝ හොයා ගන්නටය.
තමුන්ට අයත් වැට යාබද ඉඩම් හිමියා විසින් දරට කපන බවට ලද තොරතුරක් මත වැට අයත් ඉඩම් හිමියා ඉඩමට පැමිණ බලද්දී කාරණය සත්‍යයක් බව දැකගන්නට ලැබිණි.
ප්‍රතිමල්ලවයා සමග කිසිදු ගැටුමකට නොගිය හෙතෙම කෙළින්ම පොලීසියට ගොස් සිද්ධිය පිළිබඳ පැමිණිල්ලක් දැම්මේ නීතියට සියල්ල බාර කරමිනි.
පැමිණිල්ලට අනුව දෙපාර්ශවයටම පොලීසියෙන් කැඳවීමක් ලැබිණි. ‘වැට අයිති මට. මගේ අවසරයක් නැතුව වැට මුලින්ම කපල මෙයා විකුණන්නයි ලෑස්ති. ‘‘වැට හිමියා තම පැමිණිල්ල ඉදිරිපත් කළේය. ‘සර් වැටේ ගස් ඔක්කොම මගේ වත්තට නැමිලා. ඉර එළිය වැටෙන්නෙත් නැහැ. වදුල නිසා ගහක් කොළක් හදාගන්න බැහැ ‘වැට කැපූ ඉඩම් හිමියා නිදහසට කරුණු කීවේ තම කටයුත්ත සාධාරණීයකරණය කරමිණි.
‘ඉර එළිය වැටෙන්න තමන්ගේ පැත්තේ ගස් ටික කපන එකේ වැරැද්දක් නැහැ. ඒත් ඒ වෙනුවෙන් වැටක් මුලින්ම කපන එක ලොකු වැරැද්දක්’ යැයි පවසමින් පොලිස් නිලධාරියා කරුණු පැහැදිලි කර දුන්නේ දෙපැත්තටම සාධාරණයක් කරමිණි.
කැපූ වැට කොටසේ අලෙවියෙන් ලැබෙන මුදල වැට හිමියාට ගෙවීමේ පොරොන්දුව පිට පාර්ශවකරුවන් සිද්ධිය සමථයකට පත්කර ගත්තේ පොලිස් නිලධාරියාට පින්සිදුවන්නටය.
