කරන්දෙණිය එම්.සුසිල් ප්‍රියන්ත
විදුලි බිල ජනවාරි මස යළි ඉහළ දැමීමට සිදුවෙනවා යැයි අදාළ ඇමැතිවරයා රූපවාහිනියෙන් කියනු ඇසී ඇතිවුණු වාවනු බැරි කේන්තිය නිසා අලි අමාරුවක වැටුණු අයෙකු පිළිබඳ පුවතක් දකුණු පළාතේ ගමකින් අසන්නට ලැබේ.
දවස තිස්සේ මහන්සිවී රෑ බෝවී ඔහු රූපවාහිනිය නරඹමින් සිටියේ රැ ආහාර අනුභව කරමිනි. ඔහු ආහාර ගනුයේ ලොකු වතුර වීදුරුවක් ළඟ තබා ගෙනය. ඒ කෑම කන අතරමග වතුර බීමට පුරුදුව සිටීම එයට හේතුව වී තිබිණ.
විදුලි බිල නහුතෙට වැඩි කිරීම නිසා එදා වේල කුලියක් මලියක් කරගෙන ජීවත්වූ ඔහු සිටියේ ඊට දැඩි කේන්තියෙනි. ආයෙත් වරක් අකමැත්තෙන් වුවද ජනවාරි මාසයේ සිට විදුලි බිල වැඩි කරන්න වෙනවා යයි විෂයභාර අමාත්‍යවරයා රූපවාහිනියට කියන්නේ ඔය අතරවාරයේදීය. ඒ සමගම ඔහුට උන්හිටි තැනද අමතක වී ගියේය.
ඒ සමගම පැමිණි කේන්තිය පාලනය කර ගැනීමට නොහැකිවු ඔහු බි බී සිටි ජෝගුවෙන් රූපවාහිනියට දමා ගසන්නේය. මුළු රූපවාහිනියම වතුරෙන් නැහැවෙන්නේ ටික වේලාවකින් එය අකීයවීමත් සමගමය. ගිය නුවන ඇතුන් ලවාවත් ඇද්ද ගැනීමට නොහැකි යයි කියන්නාක් මෙන් ඔහුගේ කේන්තිය අවසන් විය.
අලු‍ත් රූපවාහිනියක් ගැනීමට රුපියල් ලක්ෂ ගණනක් අවශ්‍ය බැවින් දවසේ කුලී වැඩටද නොගොස් රූපවාහිනී අලු‍ත්වැඩියා කරන අයකු ළඟට එය රැගෙන යන්නේ බිරින්දෑ සහ දරුවන්ගේ අඩහැරය මධ්‍යයේය. තමා කරගත් මෝඩකමේ තරම ඔහුට තේරෙන කොට පෙරහර ගොස් හමාරය.
