(මොරගොල්ලාගම සිසිර කැලේගම)
අසනීපව සිටින බිරිඳ රැකබලා ගැනීමට පිටස්තර සිටින දරු දෙදෙනා නිවෙසට ගෙන්වා සැමියා අනියම් බිරිඳගේ නිවෙසට සිය කැමැත්තෙන්ම නිරෝධායනය වීමට ගිය පුවතක් පොල්පිතිගම පොලිස් බල ප්‍රදේශයෙන් වාර්තා වේ.
සිද්ධිය මෙසේය.
ඔහු විවාහක දෙදරු පියෙකි. තම බිරිඳ අංශභාගය රෝගය වැළඳී කාලයක සිට නිවසේ රැඳී ප්‍රතිකාර මත පසුවන්නියකි.
තම වැඩිමල් පුතාත්, බාල දියණියත් විවාහ වී පිට පළාත්වල වාසය කරති.
ඇඳිරි නීතිය පනවන කාලසීමාව තුළ නිවෙසේ පසුවූ පියා තම දරුවන් අමතා කියා ඇත්තේ, අම්මාට අසනීප වී ඇති බැවින් වහාම ගෙදරට පැමිණෙන ලෙසටය.
ඒ අනුව බස්නාහිර පළාතේ ජීවත්වෙන පුතා හා දියණිය වහාම අදාළ පොලිස් ස්ථාන වෙත ගොස් ඇඳිරි නීති බලපත්‍ර සකසාගෙන නිවෙසට පැමිණ ඇත්තේ පියාගේ දැනුවත් කිරීමට අනුව අම්මා අසනීපයෙන් පසුවන නිසා ඇයට ප්‍රතිකාර ලබාදී ඇය රැකබලා ගැනීමටය.
දුව දරුවන් හා විවාහක බෑනා සමගින් ද, අලුත විවාහක පුතු තම ලේලිය සමගින්ද නිවෙසට පැමිණි පසුව පියා හදිසියේ නිවසින් අතුරුදන්ව ඇත.
ඒ ගැන සොයා බැලීමේදී පියා අනියම් ඇසුරක් පවත්වන විවාහයෙන් වෙන්ව සිටින එක්දරු මවකගේ නිවසට ගොස් ඇති බවත්, ඇය ස්වයං නිරෝධායනයට ලක්කර ඇති බැවින්, එහි ගිය මෙම තැනැත්තා ද මහජන සෞඛ්‍ය පරීක්ෂකවරුන්ගේ මැදිහත්වීමෙන් දින 14කට එහි ස්වයං නිරෝධායනයට ලක්කර ඇති බවත් තම දරුවන්ට එහිදී දැන ගන්නට ලැබුණි.
ඒ පිළිබඳව දරුවන් පොලිසියට පැමිණිලි කිරීමට ගොස් ඇතත්, දින 14 කාලය නික්ම යනතුරු සිද්ධිය සම්බන්ධව පැමිණිල්ල විභාග කිරීමට නොහැකි තත්ත්වයක් උදාවී ඇති බැව් පොලිසිය පැවසීමෙන් පැමිණිල්ල විභාග කිරීමට නොහැකි තත්ත්වයක් උදා වී ඇති බැව් පොලිසිය පැවසීමෙන් අනතුරුව දරුවන්ගේ පියා හිතාමතාම දරුවන් නිවෙසට කැඳවා සිය කැමැත්තෙන්ම ස්වයං නිරෝධායනයට ලක්ව ඇති අනියම් ඇසුර පවත්වන එම නිවෙසට ගොස් ඇති බවට එම දරුවන්ටද තොරතුරු අනාවරණය වී ඇත.
