දඹුල්ල - කාංචන කුමාර ආරියදාස
විවාහ මංගල්‍යය දා තම හොඳම මිතුරාගේ දෙපා වැඳ මින් මතු කිසිම දිනක තම නිවෙසට පැමිණීමෙන් වළකින ලෙස ඉල්ලා සිටි අපූරු මනාලයකු පිළිබඳ පුවතක් දඹුල්ල නාගරික බලප්‍රදේශයට නොදුරු ගමකින් වාර්තා වෙයි.
කාලයක සිට අඹ යහළුවන් වූ මිතුරන් දෙදෙනකු එකම ප්‍රදේශයේ ජීවත්ව සිට ඇත. වයසින් බාල වූ එක් අඹ යහළුවකු විවාහ වී සිටි අයෙකි. වයසින් වැඩිමහලු වූ අවිවාහක ලෙස ජීවත් වූ අනෙකා විවාහ නොවී සිටීමට තීරණය කර සිටි අයෙකි. මවුපියන්ගේ දැඩි පෙරැත්ත මත මවුපියන් විසින් සොයා දෙනු ලැබූ යුවතියක සමග ඔහු විවාහ වූයේය.
මෙම මංගල අවස්ථාවට දෙපාර්ශ්වයේම ඥාතීන්, මිතුරු මිතුරියන් පැමිණ සිටින අවස්ථාවක වයසින් වැඩිමහල් වූ අඹ යහළුවාගේ විවාහ මංගල්‍යයට වයසින් බාල වූ අඹ යාළුවා ඔහුගේ බිරිය සමග පැමිණියේය.
එකවරම සිය මනාලිය අතින් අතහැර අඹ යහළුවා දුටු මනාලයා දිව යන්නට විය.
සාදයේ සිටි සියලු දෙනාම හිතාගෙන සිටියේ අඹ යහළුවා නිසා මිතුරුදම නිසා ඔහුව සිප ගැනීමට හෝ වැළඳ ගැනීමට දිව යන බවය. මිතුරාගේ බිරිය ද සිනහා මුසු මුහුණින් මනාලයා පිළිගැනීමට සූදානම් වෙද්දීම තම වයසින් බාල අඹ යහළුවා ළඟ දණ ගසා මනාලයා වඳින්න වූයේය.
“මචං අපි දෙන්නා යාළුවෝ තමයි. ඒත් අද අපේ ගෙදරට ආවට කමක් නෑ, මීට පස්සේ කවදාවත් අපේ ගෙදරට එන්න එපා. අපේ යාළුකම අතරමගදි තියාගමු. මෙහෙම කිව්වට මාත් එක්ක තරහ වෙන්න එපා මොකද අපි දෙන්නා දන්නවා ඉස්සර කළ කී දේ මොනවද කියලා. ඒ විස්තර සියල්ල අදින් ඉවරයි. උඹෙන් මම ඉල්ලන තෑග්ග තමයි අපේ ගෙදර මින් පස්සේ එන්න එපා.”
මනාලයාගේ මුවින් පිටවුණේ එවැනි වදන් පෙළකි.
මිතුරාගේ බිරියගේ මුහුණ දෙස මංගල සාදයේ බොහෝ දෙනාගේ දෙනෙත් ගැටෙන්නට විය.
දැඩි ලෙස සිත් වේදනාවට පත් වයසින් බාල අඹ යාළුවා කිසිත් කර කියා ගැනීමට නොහැකිව අවට අයගේ හොර රහසේ මුහුණ බලා බිම බලාගෙන එම ස්ථානයෙන් පිටව යද්දී මනාලිය ද දෑස්වල කඳුළු පුරවාගෙන මනාලයාගේ දෑත තදින් අල්ලාගෙන නිවෙසට ගොස් ඇත.
