පුතාගේ පෙම්වතියගේ තොරතුරු සොයන්න ඇයගේ ගමට ගොස් රහස් පොලිස් රගපෑමක් කළ මාමණ්ඩිය අල්ලා පොලිසියට භාර දුන් අපූරු කතාවක් දකුණු පළාතේ දුෂ්කර ගම්මානයකින් වාර්තාවේ.
ආරක්ෂක අංශයක සේවය කරන පෙම්වතාගේ පියා වෘත්තියෙන් බලයෙන් හිස උදුම්මාගෙන ක්‍රියා කරන පුද්ගලයෙකු බවට අවට ගම් කීපයක ද ප්‍රසිද්ධියක් ඉසිලීය.
තෝරාගත් පිරිසක් පමණක් ආශ්‍රය කිරීමට පුතාට සහ බිරිඳට අවසර ලැබුණු අතර තරුණයා සමාජශීලි ගමේ සියලුම දෙනා සමග ඉතාමත් සුහදව ආචාරශීලි ලෙස හැසිරෙන පුද්ගලයකු ලෙස හැමදෙනා අතර ජනප්‍රිය වී සිටියේය.
පියාගේ නිල ඇඳුමේ රස්නය නොවැදුණු තරුණයා සරසවි කඩඉමද ජයගෙන රජයේ රැකියාවක ද නිරතව සිටියේය. පුතාට සරසවියේදී දැන හැදිනගත් තරුණියක සමග ප්‍රේම සම්බන්ධතාවක් ඇති බවට බිරිය ලබාදුන් ආරංචියත් සමග පියා යක්ෂාරුඩ වූයේය. බිරියට ද බැන වදිමින් පුතාගේ පෙම්වතිය පිළිබඳව තොරතුරු හාරා අවුස්සන්නට වූයේ නිල ඇඳුමේ රස්නය හතර වටින්ම පිට කරමිනි.
පුතාගේ පෙම්වතිය දුෂ්කර ප්‍රදේශයක තැනැත්තියක බව දැනගත් පියා ඇයගේ වතගොත සෙවීමේ මෙහෙයුමක් ආරම්භ කළේය. ඉන් නොනැවතුණ ඔහු කිලෝමිටර් එකසිය පනහකට වැඩි දුරකින් පිහිටි පුතාගේ පෙම්වතියගේ ගමට යාමට තීරණය කළේය. නිවාඩුවක් ද ලබාගෙන උදේ පාන්දරින් යතුරු පැදියට ගොඩ වුණ පියා පෙම්වතියගේ ගමට ගොස් හමුවන පුද්ගලයන්ගෙන් තොරතුරු විමසන්නට විය.
තරුණියගේ මව පියා ගොවිතැනින් ජීවත් වූ අතර ඔවුනට දියණියන් දෙදෙනකු පමණක් සිටි අතර ගමේ හැම දෙනාම ඔවුනට ආදරය කළහ. විවිධ දේවල් ගැන විමසමින් පෙම්වතාගේ පියා ගමේ හැම තැනම ඇවිද ගිය අතර යතුරු පැදියකින් ගමන් කරමින් සිටි තරුණයන් දෙදෙනකු නවතා අනාගත ලේලියගේ නිවස පිළිබඳව වටින් ගොඩින් තොරතුරු විමසන්නට විය. ගමට පැමිණි ආගන්තුකයා පිළිබඳව සැක සිතුණ තරුණයන් තම මිතුරන් කිහිප දෙනකු ද එතනට කැඳවා ඔහුගෙන් ප්‍රශ්න කළේ නිසි ලෙස හඳුනාගෙන උදව් කිරීමටය. නිල ඇඳුමේ රස්නය ඔළුවට දැනුන පෙම්වතාගේ පියා තරුණයන්ගේ ප්‍රශ්නවලට පිළිතුරු දෙනවා වෙනුවට ඔවුන් සමග වාදයකට පැටලු‍ණේය.
එම ස්ථානයට පොලිසිය කැඳවූ තරුණයෝ ආගන්තුකයා පොලිසියට භාර දුන්හ. පෙම්වතාගේ පියාගෙන් සිදුකළ ප්‍රශ්න කිරීම්වලදී ඔහු තමන් පැමිණි කාරණය පොලිසියට හෙළි කළේය. නිලබලය අවභාවිත නොකරන ලෙස පෙම්වතාගේ පියාට පොලිසිය අවවාද කර තරුණයන්ට කාරණය පැහැදිලි කළේය.
අනාගත ලේලිය පිළිබඳ තොරතුරු සෙවීම අවසන් කර ඇයගේ ගමෙන් කඩිනමින් පිටව ගිය අතර ගමේ තරුණයන් විසින් සිය යෙහෙලියට සිදුවීම පවසා ඇති අතර පියා නිවසට යාමට පෙර පෙම්වතාගේ කනට ද ආරංචිය ලැබී තිබුණු අතර පසු දින රාජකාරියට වාර්තා කළ පසු ප්‍රධානියා පෙර දින සිදුවීම පිළිබඳව ප්‍රසිද්ධියේ දොස් පැවරීම නිසා කාර්යාල මිතුරන් ද සිද්ධිය දැන ගත්තේය.
ලේලි කොහොමද යනුවෙන් පෙම්වතාගේ පියාගෙන් මිතුරන් විමසන විට ලු‍ණු ඇඹුල් සහිතව ඔහු පිළිතුරු සපයන බවත් සැලවේ.
හක්මණ විශේෂ දෙනගම යසන්ත ආරියසේන
