(ඩිල්ෂානි චතුරිකා දාබරේ)

ඇඳිරිනීතිය කාලයේදී විදුලි හා ජල පාරිභෝගිකයනගේ අභ්‍යන්තර විදුලි හා ජල පරිපථ දෝෂවලට කඩිනම් විසඳුම් ලබාදීම සඳහා විශේෂ සේවාවක් හෙට (04) සිට ක්‍රියාවට නැංවෙන බව ශ්‍රී ලංකා මහජන උපයෝගිතා කොමිෂන් සභාව පවසයි.
 
ජාතික ජල සම්පාදන හා ජලාපවාහන මණ්ඩලය, ලංකා විදුලිබල මණ්ඩලය, ලංකා විදුලි පුද්ගලික සමාගම සහ ශ්‍රී ලංකා මහජන උපයෝගිතා කොමිෂන් සභාව ඒකාබද්ධ මෙම සේවාව ක්‍රියාත්මක කරනු ලැබේ.
 
ආරම්භයේදී, දැනට ඇඳිරි නීතිය ක්‍රියාත්මක කොළඹ, ගම්පහ සහ කළුතර යන දිස්ත්‍රික්ක සඳහා මෙම විශේෂ සේවාව ක්‍රියාත්මක කරනු ලබන අතර අවශ්‍යතාව මත අනෙකුත් දිස්ත්‍රික්ක සඳහා ද මෙය ක්‍රියාත්මක කරන බව එම කොමිෂන් සභාව සඳහන් කරයි.
 
ඒ අනුව, අභ්‍යන්තර දෝෂ නඩත්තුව සඳහා  ප්‍රදේශයේ විදුලි කාර්මිකයකුගේ හෝ ජල නල කාර්මිකයකුගේ සහාය ලබාගැනීමට අදාළ පාරිභෝගිකයාට මෙම සේවාවෙන් පහසුකම සැලසේ.
 
ලංකා විදුලි සේවා බිඳවැටුම් හා ජල සේවා බිඳවැටුම් සම්බන්ධයෙන් ක්‍රියාත්මක ක්ෂණික ඇමතුම් සේවාව දැනටමත් ක්‍රියාත්මක බැවින්, ඒ හරහා පාරිභෝගික පරිශ්‍ර තුළ පිහිටි අභ්‍යන්තර විදුලි හා ජල සේවා පද්ධතිවල දෝෂ අලුත්වැඩියා කරගැනීම සඳහා පාරි‍භෝගිකයන්ට ගැටලු ඉදිරිපත්කිරීමට මේ යටතේ පහසුකම් සලසා ඇති බවද එම නිවේදනයේ සඳහන් වේ.
 
ඒ අනුව,

ජලනල කාර්මිකයකුගේ සේවය ලබාගැනීම සඳහා - 1939

ලංකා විදුලි බල මණ්ඩලයේ විදුලි පාරිභෝගිකයකුගේ අභ්‍යන්තර විදුලි පද්ධතියෙහි දෝෂයකට  උපදෙස් ලැබීම සඳහා - 1987

ලංකා විදුලි පාරිභෝගිකයකුගේ අභ්‍යන්තර විදුලි පරිපථයෙහි දෝෂයක් වූ විට - 1910

වැඩිදුර තොරතුරු සඳහා (ශ්‍රී ලංකා මහජන උපයෝගිතා කොමිෂන් සභාව)- 0764271030 යන අංක ඇමතිය හැකිය.