(සිතුම් චතුරංග)
 
වවුනියාව, ආසිකුලම, ආචිපුරම් ගම්මානයේ ජනතාව මත්ද්‍රව්‍ය ජාවාරම් කරන පිරිසක් බවට වවුනියාව දිස්ත්‍රික් සංවර්ධන කමිටු සභාපති වන්නි දිස්ත්‍රික් පාර්ලිමේන්තු මන්ත්‍රී කේ.දිලීපන් මහතා කළ ප්‍රකාශයක් හෙළාදකිමින් එම ගම්මානයේ වැසියෝ අද(15) ආචිපුරම් ප්‍රජාශාලාව ඉදිරිපිට විරෝධතාවක නිරතවූහ.
 
වවුනියාව ප්‍රාදේශීය සංවර්ධන කමිටු රැස්වීමක් අතරතුර පාර්ලිමේන්තු මන්ත්‍රීවරයා ආචිපුරම් ගම්මානයේ පිරිස ජාවාරම්කරුවන් බවට හඳුන්වා දී ඇති බවත්, ඒ හේතුවෙන් පොලිසිය මත්ද්‍රව්‍ය සොයා පැමිණ නිරන්තරයෙන් ගමේ ජනතාවට බලපෑම් හා හිරිහැර කරන බවත් විරෝධතාවයේ නිරත පිරිස පැවසූහ.
 
ගමේ ජනතාව අවි ආයුධ සහිත මත්ද්‍රව්‍ය ජාවාරමේ නිරත පිරිසක් බවට මන්ත්‍රීවරයා  හඳුන්වාදීම පදනම් විරහිත බවත්, ඔහු කළ ප්‍රකාශයට ගමේ ජනතාවගෙන් සමාව ගන්නා ලෙසත් විරෝධතාකරුවෝ ඉල්ලා සිටියහ.
 
මන්ත්‍රීවරයාගේ ප්‍රකාශයත් සමඟ ගමේ තරුණ පිරිස පොලිසියේ හිරිහැරවලට ලක්වන අතර ඇතැම් දරුවන්ට මෙම සිද්ධීන් මානසිකව බලපෑමක් වී ඇති බවද ඔවුහු කීහ.
 
තමන් ගොවිතැන්කර ජීවත්වන පිරිසක් බවත්, දේශපාලඥයින් සිය දේශපාලන න්‍යායන් ක්‍රියාත්මක කිරීමට ගමේ ජනතාව අසමඟි කර, ජාවාරම්කරුවන් ලෙස ප්‍රකාශ කිරීම බලධාරීන් මැදිහත්ව නවතාදෙන ලෙසද විරෝධතාකරුවෝ ඉල්ලා සිටියහ.