(සිතුම් චතුරංග)
 
වවුනියාව දකුණ සිංහල ප්‍රාදේශීය සභාවේ සභාපතිවරයා විසින් කරන ලද අක්‍රමිකතා සහ එහි සේවයේ නිරත නිලධාරීන්ට කරන බලපෑම් නවතා දමන ලෙස ඉල්ලමින් ප්‍රාදේශීය සභාවේ නිලධාරීහු අද (04) එම ප්‍රාදේශීය සභාව ඉදිරිපිට නිහඬ විරෝධතාවක නිරතවූහ.
 
ප්‍රාදේශීය සභාවේ සභාපතිවරයා බීමත්ව පැමිණ, ලේකම්වරිය ඇතුළු රාජ්‍ය සේවකයින් වෙත අසභ්‍ය වචන කියමින් බැණවදින බවත්, නීත්‍යානුකූල බවකින් තොරව පරිපාලන කටයුතු කිරීමට ප්‍රාදේශීය සභාවේ ලේකම්වරිය වෙත බලපෑම් කරන බවත් විරෝධතාකරුවෝ පැවසූහ.
 
මේ හේතුවෙන් රාජ්‍ය සේවකයෝ පිරිස තම සේවා කටයුතුවලින් ඉවත්ව විරෝධතාවයේ නිරතවූහ.
 
සභාපතිවරයා ආයතන සංග්‍රහය හා මුදල් රෙගුලාසි ඇතුළු චක්‍රලේඛනවලට පටහැනිව රාජකාරී කිරීමට බලපෑම් කරන බවත් විරෝධතාකරුවෝ වැඩිදුරටත් පැවසූහ. ප්‍රාදේශීය සභා සභාපතිවරයාගේ ක්‍රියාකලාපය හේතුවෙන් ප්‍රාදේශීය සභාවට ලැබියයුතු සියලු ආදායම් මේ වනවිට අහිමිව ගොස් ඇති බවත් ප්‍රදේශයේ ජනතාවගේ සංවර්ධනයට ලැබුණ මුදල් ඔහුගේ අවිධිමත් ක්‍රියාකලාපය හේතුවෙන් නැවත භාණ්ඩාගාරයට හරවා යවා ඇති බවත් ඔවුහු චෝදනා කළහ. ඇතැම් සේවකයින් සභාපතිගේ බලපෑම් මත දේශපාලන කටයුතු සඳහා යොදාගැනීම හේතුවෙන් ප්‍රාදේශීය සභාවේ පරිපාලනයද අඩපණ වී ඇතැයිද ඔවුහු කීහ.
 
සභාපතිවරයාගේ ක්‍රියාකලාපය හේතුවෙන් අසීරුතාවට පත් රාජ්‍ය නිලධාරීන් වෙත නිසි විසඳුමක් ලබානොදුනහොත් ඉදිරියේදී දැඩි වෘත්තීය ක්‍රියාමාර්ග ගන්නා බවද විරෝධතාවයේ නිරත රාජ්‍ය නිලධාරීහු පැවසූහ.