(ශාන්ත ප්‍රදීප් කුමාර කුලරත්න) 

හෝමාගම විදුලිබල  මණ්ඩල කාර්‍යාලයට  විදුලි බිල් පතක් ගෙවා නැවත එමින් සිටි පුද්ගලයකු  එම කාර්යාලය පරිශ්‍රය  තුළදීම  වැටී මියගොස් ඇතැයි  හෝමාගම පොලිසිය පවසයි .

මෙසේ මියගොස් ඇත්තේ හෝකන්දර , සිංහපුර, පදිංචි අන්ද්‍රා  හැන්නදිගේ කරුණාරත්න  (59) තිදරු පියකු බව පොලිසිය කියයි .

මෙම පුද්ගලයාට අයත් නිවසක විදුලි බිල්පතක්  ගෙවීම සඳහා හෝමාගම  විදුලිබල මණ්ඩල කාර්යාලයට පැමිණ ඇති අතර බිල්පත ගෙවා නැවත නිවසට යමින් සිටියදී  එක්වරම,කාර්යාල පරිශ්‍රය තුළ බිම ඇද වැටී ඇතැයි පැවසේ.

පසුව එම ස්ථානයට බිල්පත් ගෙවීම සඳහා පැමිණ  සිටි  කිහිපදෙනෙකු බිම ඇදවැටුණු පුද්ගලයා ප්‍රතිකාර සඳහා හෝමාගම මූලික රෝහලට ඇතුළත් කිරීමට රැගෙන යන අතරතුර දී මෙසේ මිය ගොස් ඇතැයි පැවසේ .

ඒ අනුව සිද්ධිය වූ ස්ථානයට හෝමාගම හදිසි මරණ පරීක්ෂක සාම විනිසුරු  චින්තක  උදයකුමාර මහතා පැමිණ  ස්ථානීය පරීක්ෂණය සිදුකරන ලදී.

මියගිය පුද්ගලයා පදිංචි ප්‍රදේශය අයත් තලංගම  පොලිස් ස්ථානයට සිද්ධිය වාර්තා කිරීමත් සමඟ ඉන්  පොලීස් නිළධාරියෙකු පැමිණ මෘත දේහය පිළිබඳ පශ්චාත් මරණ පරීක්ෂණය  සඳහා ඉදිරි විමර්ශන කටයුතු ආරම්භ කරන ලදී.

ඒ අනුව මෘත දේහය  පිළිබඳ පශ්චාත් මරණ පරීක්ෂණ හෝමාගම හදිසි මරණ පරීක්ෂක සාමවිනිසුරු චින්තක උදයකුමාර මහතා විසින් අද (7) හෝමාගම මූලික රෝහලේ හදිසි මරණ පරීක්ෂණ අධිකරණයේ දී  සිදුකිරීමට නියමිත ය.