(රංජිත් රාජපක්ෂ)            

නොර්වුඩ් පොලිස් වසමට අයත් කර්කස්වොල් වතුයායේ විදුලි බලාගාරයේ වැඩට ගිය විදුලි කාර්මිකයාගේ සිරුර එම වත්තේ ඇළ මාර්ගයක තිබී අද (4)  හමු වූ බව නොර්වුඩ් පොලිසිය පවසයි.

මෙලෙස මිය ගොස් ඇත්තේ බගවන්තලාව කර්කස්වොල් වතුයායේ පදිංචි අරුමුගන් රවිකුමාර් නම් 42 හැවිරිදි පුද්ගලයෙකි.

එම වතු යායට අයත් විදුලි බලාගාරයේ වැඩට ගිය ආරුමුගන් රවීකුමාර්ගේ සිරුර එම විදුලි බලාගාරයට ජලය ලබා ගන්නා ඇළ මාර්ගයේ තිබෙන බවට එම ඇළ මාර්ගය අසළ තෘණ කැපීමට ගිය වතු කම්කරුවෙකු දැක ඒ පිළිබඳව වතු පාලන අධිකාරියට දැනුම් දිමෙන් පසු වතු පාලන අධිකාරිය පසුව නොර්වුඩ් පොලිසියට දැනුම් දි ඇත.

එම විදුලි බලාගාරයට ජලය ලබා ගනු ලබන්නේ මෙම ඇළ මාර්ගය හරස් කරමින් නිසා ජල විදුලි බලාගාරයේ වැඩට ගිය විදුලි කාර්මිකයා ඇළ මාර්ගයට වැටෙන්නට ඇති බවට සිද්ධිය සම්බන්ධයෙන් පරික්ෂණ පවත්වන නොර්වුඩ් පොලිසිය සැකකරයි.

හැටන් දිසා විනිසුරු සහ මහෙස්ත්‍රාත්වරයාගේ ස්ථාන පරික්ෂාවෙන් පසු සිරුර ගොඩගෙන පශ්චාත් මරණ පරිකෂාව සදහා දික්ඔය මුලික රෝහලේ විශේෂඥ අධිකරණ වෛද්‍යවරයා වෙත යොමු කරන බව නොර්වුඩ් පොලිසිය පවසයි.