(තිළිණි ද සිල්වා  සහ රන්ජන් කටුගම්පොළ )

පළාත් පාලන මැතිවරණයේදී මහරගම, මහියංගනය, බුත්තල , කොළඹ , පානදුර, අගලවත්ත, කින්නියා, තිරප්පනේ, වැලිගම, බදුල්ල ආදි පළාත් පාලන ආයතනයන් සදහා ශ්‍රී ලංකා පොදු ජන පෙරමුණ ඇතුළු පක්ෂ සහ ස්වාධීන  කණ්ඩායම් හි නාම යෝජනා පත්‍ර ප්‍රතික්ෂේප   කිරීමට එරෙහිව ගොනු කොට ඇති පෙත්සම් 14 ක් සළකා බැලීම ලබන සිකුරාදා තෙක් කල් තැබීමට අභියාචනාධිකරණය අද(16) තීරණය කළේය.

අභියාචනාධිකරණ සභාපති විනිසුරු  ප්‍රීති පද්මන් සූරසේන සහ ශිරාන් ගුණරත්න යන මහත්වරුන් හමුවේ අද මෙම පෙත්සම කැඳවූ අතර එහිදී පෙත්සම්කරුවන් ගේ නීතීඥවරුන් කල් ඉල්ලා සිටීමත් සමග පෙත්සම් සලකා බැලීම මෙදිනට කල් තැබිණි.

එසේම මෙම පෙත්සම්වල සඳහන් ආකාරයට නාමයෝජනා ප්‍රතික්ෂේප   වීමට හේතුන් වෙන් වෙන්ව සලකා බැලීමට ද අභියාචනාධිකරණ විනිසුරු මඩුල්ල තීරණය කළේය.

මෙම පෙත්සම් හි වගඋත්තරකරුවන් වශයෙන් ඒ ඒ දිස්ත්‍රික් හි තේරීම් බාර නිලධාරීන් , මැතිවරණ කොමිසමේ සභාපති සහ එම කොමිසමේ සාමාජිකයන් සහ නීතිපතිවරයා ඇතුළු පිරිස් නම් කරනු ලැබ සිටිති.