(අංජුල මහික වීරරත්න)ෙ

සේනානායක සමුද්‍රයේ සොරොව් කුලුන, සොරොව් බැරලය හා අවශේෂී කොටස් නැවත ඉදිකිරීමේ ව්‍යාපෘතියට සුදුසු කොන්ත්‍රාත්කරුවකු තෝරා ගැනීම සඳහා කැබිනට් අනුමැතිය ලැබී ඇත.

1953-08-28 දින ජනතා අයිතියට පත් කරනු ලැබ ඇති සේනානායක සමුද්‍රය කුඹුරු අක්කර 120,000ක පමණ ප්‍රදේශයකට වාරි ජලය සපයනු ලබන අතර, මෙගාවොට් 20ක ධාරිතාවයක විදුලිය ජාතික පද්ධතියට එක් කිරීමට දායක වේ.

 1992 වසරේදී එහි ප්‍රධාන බැම්ම හා සම්බන්ධ සොරොව් කුලුනෙහි හා සොරොව් බැරලයෙහි සහ ප්‍රධාන බැම්මෙන් පිටත ඉදි කර ඇති පිටවාන නිර්මිතයෙහි පැලීම ඇති වීම මුල් වරට නිරීක්ෂණය කර ඇත.

 කාලයත් සමඟ එම පැලීම් විශාල වෙමින් හා පැතිරෙමින් තිබේ. මේ සඳහා ස්ථිර විසඳුමක් ලබා දීම පිණිස අදාළ නිර්මිත නැවත ඉදි කළ යුතු බව හඳුනාගෙන ඇති නමුත්, ඉදිකිරීම් සඳහා අධික පිරිවැයක් දැරීමට සිදු වීම, වසර 2ක පමණ කාලයක් ජලාශය හිස් කර තැබීමට සිදු වීම හේතුවෙන් විශාල වගා භූමි ප්‍රමාණයකට වාරි ජලය සැපයීමට නොහැකි වීම මඟින් රටේ විශාල සහල් හිඟයක් ඇති වීමට අවකාශ ඇති වීම සහ ප්‍රමාණවත් තාක්ෂණික හැකියාවක් නොමැති වීම වැනි කරුණු මත නව සොරොව් නිර්මිතයක් ඉදි කිරීම මේ දක්වා කළ නොහැකි වි ඇත.

 පවතින අවදානම සහ ආපදාවකදී සිදු විය හැකි හානිය අඩු කර ගැනීම පිණිස 2025 යල කන්නයට ජලය නිකුත් කිරීමෙන් පසු ජලාශයේ මුළු ධාරිතාව 40%කට ආසන්න ප්‍රමාණයක පවත්වා ගනිමින් යෝජිත ඉදිකිරීම සිදු කිරීම සඳහා සැලසුම් කර තිබේ. 

ඒ අනුව, ලෝකයේ දැනට පවතින නවීනතම තාක්ෂණික දැනුම ලබා ගැනීමට හැකි වන පරිදි, ජාත්‍යන්තර තරගකාරී ලංසු කැඳවා අදාළ ඉදිකිරීම් සඳහා සුදුසු කොන්ත්‍රාත්කරුවකු තෝරා ගැනීම පිණිස කෘෂිකර්ම, පශු සම්පත්, ඉඩම් සහ වාරිමාර්ග අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.