(සුජිත් හේවාජුලිගේ)

අපනයන සංවර්ධන මණ්ඩලයේ ප්‍රවාහන දීමනා හිමිකම් නොමැති  සේවකයන් එකසිය හැට දෙදෙනෙකුට ප්‍රවාහන දීමනා වශයෙන් එක්කෝටි තිස්නව  ලක්ෂයක් 2023 වසරේ දී ගෙවා ඇතැයි ජාතික විගණන කාර්යාලය නිකුත් කළ අලුත්ම  වාර්තාවක සඳහන්වේ.

ප්‍රවාහන දීමනා හිමිකම නොමැති පීඑල්, එම්.ඒ සහ  ජේඑම් කාණ්ඩවල සේවකයන් 162කට මෙසේ ප්‍රවාහන දීමනා ගෙවා ඇති බව එම වාර්තාවේ දැක්වේ.

එසේම කාර්ය මණ්ඩල සේවකයන් සඳහා එම වර්ෂයේදී  රුපියල් හාර කෝටියකට වැඩි ණය ලබාදී ඇති බවද ජාතික විගණන කාර්යාලය පවසයි.

රාජ්‍ය ව්‍යාපාර දෙපාර්තමේන්තුවේ අනුමැතිය නොමැතිව මණ්ඩලයේ අධ්‍යක්ෂ මණ්ඩලයේ අනුමැතිය  සියයට 4.2 ක පොලී අනුපාතිකයක් යටතේ මෙලෙස ණය  ලබාදී ඇති බව සඳහන්වේ.

මේ තොරතුරු සඳහන් වන්නේ අපනයන සංවර්ධන මණ්ඩලයේ 2023 වාර්ෂික වාර්තාවට ඇතුළත් කරනු ලැබ ඇති විගණන ලේඛනයේය. මෙම වාර්ෂික වාර්තාව පසුගිය 20  වැනිදා පාර්ලිමේන්තුවට ඉදිරිපත් කෙරිණ.