(ඉන්දිකා රාමනායක)

සංචරණ සීමා උල්ලංඝනය කිරීම සම්බන්ධයෙන් එරාවුර් නගරයේදී පුද්ගලයන් පිරිසක් මාර්ගයේ දණගස්වා හිරිහැර කිරීමේ සිද්ධිය සම්බන්ධයෙන් යුද හමුදා පොලිසිය විශේෂ පරීක්ෂණයක් ආරම්භ කර ඇති බව හමුදාව කියයි.

මෙම සිද්ධියට සම්බන්ධ වු නිලධාරියෙක් ඇතුළු යුද හමුදා කණ්ඩායම වහාම ක්‍රියාත්මක වන පරිදි ස්ථාන මාරුවීම් කර ඇති බව හමුදා ප්‍රකාශක බ්‍රිගේඩියර් නිලන්ත ප්‍රේමරත්න මහතා පවසයි.

එරාවුර් නගරයේ සංචරණ සීමා උල්ලංඝනය කරමින් සිටි පිරිසක්. අල්ලා ඊයේ (19) හමුදාව විසින් ඔවුන් දණ ගස්සවා අත් ඉහලට ඔසවා ගෙන ඔසවාගෙන සිටින ඡායාරූප සමාජ මාධ්‍ය ඔස්සේ ප්‍රචාරය වීමත් සමගම මෙම පරීක්ෂණය ආරම්භ කර ඇති බව හමුදා ප්‍රකාශක වරයා කීය.

බොහෝ පිරිසක් සංචරණ නීති උල්ලංඝණය කරමින් නගරයේ තැන තැන සැරිසරා ඇති බවත් හමුදාව විසින් හෝටලයක් සෝදිසියට ලක් කරන අවස්ථාවේ එම හෝටලයේ පුද්ගලයන් 18 දෙනෙකු රැදී සිට ඇති හමුදා ප්‍රකාශකවරයා කීය .

සීමා උල්ලංඝනය කරමින් කටයුතු කරන පුද්ගයන් සම්බන්ධයෙන් සොයා බලන ලෙසට නගරාධිපතිවරයාද හමුදාව දැනුවත් කර තිබූ බව හමුදා ප්‍රකාශක ප්‍රකාශකවරයා කියා සිටියේය.

කෙසේ වුවද හමුදාව මේ ආකාරයෙන් ජනතාවට හිංසා කිරීම අනුමත නොකරන බවත් එමගින් හමුදාවේ කීර්ති නාමයට ද කැළලක් ඇතිවන බව හමුදා ප්‍රකාශකවරයා සඳහන් කළේය.

මෙම සිද්ධිය සැල වූ වහාම යුද හමුදාපතිවරයාගේ නියමයෙන් යුද හමුදා පොලිසිය පරීක්ෂණ ආරම්භ කර ඇති බවත් එම පරීක්ෂණයෙන් අනතුරුව අදාළ හමුදා කණ්ඩායමට එරෙහිව උපරිම ක්‍රියාමාර්ග ගන්නා බවද හමුදා ප්‍රකාශකවරයා වැඩිදුරටත් කීය.