(සුජිත් හේවාජුලිගේ සහ  අංජුල මහික වීරරත්න)

නව පාර්ලිමේන්තුව ලබන 21 වැනිදා රැස්වන බව පාර්ලිමේන්තුවේ වැඩබලන මහලේකම්  සහ  කාර්ය මණ්ඩල ප්‍රධානී  නීතිඥ  චමින්ද  කුලරත්න මහතා පැවසීය.

ජනාධිපති අනුර කුමාර දිසානායක මහතා ලබන  එදින  10 වැනි පාර්ලිමේන්තුවේ මංගල සැසියේදී පස්වරු 3.00 ට රජයේ ප්‍රතිපත්ති ප්‍රකාශය ඉදිරිපත් කිරීමට නියමිතය.

ඒ සඳහා අවශ්‍ය කටයුතු සූදානම් කර ඇතැයි පාර්ලිමේන්තු සන්නිවේදන අංශය පවසයි.

පාර්ලිමේන්තුව රැස්වන පළමු දිනයේදී විශේෂ කටයුතු ලෙස කතානායකවරයා පත් කරගැනීම, මන්ත්‍රීවරුන් නිල ප්‍රතිඥාව හෝ දිවුරුම ලබාදීම නියෝජ්‍ය කතානායක  හා  නියෝජ්‍ය කාරක සභා සභාපති තෝරා පත්කර ගැනීම යනාදි කටයුතු  සිදු කෙරේ.

මේ දිනයේ පාර්ලිමේන්තුවේ ප්‍රධාන වගකීම් මහ ලේකම්වරිය විසින් දරනු ලැබේ.

පළමු  දිනයේදී මන්ත්‍රීවරුන් සඳහා අසුන් පැනවීමේ පිළිවෙලක් නොමැති අතර මන්ත්‍රීවරුන්ට රිසි අසුනක අසුන් ගැනීමට අවස්ථාව උදාකර දෙනු ලබන බව වැඩ බලන මහලේකම්වරයා  කීය.

සෙංකෝලය සභාගර්භයේ තැන්පත් කිරීමෙන් පසු පාර්ලිමේන්තුව රැස්වන දිනය හා වේලාව නියම කරමින් ජනාධිපතිවරයා විසින් නිකුත් කෙරුණු අති විශේෂ ගැසට් නිවේදනය මහලේකම්වරිය දිනයේ පළමු  කාර්ය ලෙස  ඉදිරිපත් කරනු ඇත.