වියට්නාමයේ දින කිහිපයක් පුරා පැවති අධික වර්ෂාව හේතුවෙන් ඇති වූ ගංවතුර සහ නායයෑම් හේතුවෙන් මිය ගිය පුද්ගලයින් ගණන 90 දක්වා ඉහල ගොස් ඇති බවත් 12 දෙනෙකු පමණ අතුරුදහන් වී ඇති බවත් විදෙස් මාධ්‍ය වාර්තා කරයි.

රට පුරා නිවාස 186,000 කට හානි සිදුවී ඇති බව වියට්නාම රජය පවසන බව විදෙස් මාධ්‍ය සඳහන් කරයි.

සති කිහිපයක් ඇතුළත කල්මේගි සහ බුවාලෝයි යන සුළි කුණාටු රට තුළට කඩා වැදීමෙන් පසුව, මෑත මාසවලදී වියට්නාමයට බලපෑ දරුණුතම කාලගුණික සිදුවීම මෙම ගංවතුර බව සැලකේ.

අද (23) උදෑසන 258,000 ක් පමණ දෙනාට විදුලිය විසන්ධි වී තිබූ අතර සමහර ප්‍රදේශයන් වල ප්‍රධාන අධිවේගී මාර්ග සහ දුම්රිය මාර්ග වල ගමනාගමනයට බාධා ඇති වු බව විදෙස් මාධ්‍ය පවසයි.

වඩාත් දරුණුතම බලපෑම් නිරීක්ෂණය වී ඇත්තේ දකුණු සහ දකුණු-මධ්‍යම වියට්නාමයේ පිහිටා ඇති ක්වාං නගයි, ගියා ලායි, ඩක් ලක්, ඛාන් හෝවා සහ ලැම් ඩොං යන පළාත් පහ තුල බව එරට රජය වාර්තා කරයි.

ඉදිරි දිනවලදී වර්ෂාව අඩු වනු ඇතැයි ප්‍රකාශ කර ඇති බව විදෙස් මාධ්‍ය වාර්තා කරයි.

මිනිසා විසින් සිදුකරනු ලබන දේශගුණික විපර්යාස හේතුවෙන් වියට්නාමය දරුණු කාලගුණික සිදුවීම්වලට වැඩි වශයෙන් නිරාවරණය වන බව එරට විද්‍යාඥයන් පවසන බවද විදෙස් මාධ්‍ය සඳහන් කරයි.

(අන්තර්ජාලය ඇසුරෙන් හසින් නවෝද්‍යා)