(අංජුල මහික වීරරත්න)

රබර් සංවර්ධන දෙපාර්තමේන්තුව සහ ශ්‍රී ලංකා මිනින්දෝරු දෙපාර්තමේන්තුව එක්ව රබර් ඉඩම් සිතියම් ගත කිරීමේ වැඩසටහනක් ආරම්භ කර ඇත.

නව්‍ය භූගෝලීය තොරතුරු පද්ධති තාක්ෂණය යොදා ගනිමින් මෙම සිතියම් ගත කිරීම සිදුකරයි.

මෙම වැඩපිළිවෙල යටතේ 2025 වසර ඇතුලත සියළු කුඩා රබර් ඉඩම් වල භූ ඛණ්ඩාංක ලබා ගැනීමට බලාපොරොත්තු වේ.  

මෙම ඉඩම් සිතියම් ගත කිරීමේ කටයුතු වලින් පසුව රබර් සංවර්ධන දෙපාර්තමේන්තුව  ගොවීන් වෙත නොමිලේ QR කේතයක් නිකුත් කරන අතර, රබර් නිෂ්පාදන විකිණීමේදී ගොවීන් විසින් මෙම QR කේතයේ ඇතුලත් තොරතුරු වෙළඳුන් වෙත සැපයීම අනිවාර්ය බව වැවිලි සහ ප්‍රජා යටිතල පහසුකම් අමාත්‍යංශය පවසයි.

යුරෝපා සංගමය විසින්  ඔවුන්ගේ  සාමාජික රටවල් වෙත රබර් ආශ්‍රිත නිෂ්පාදන හා රබර් ආශ්‍රිත නිෂ්පාදන සඳහා අවශ්‍ය වන අමුද්‍රව්‍ය අපනයනනය කිරීමේදී අනුගමනය කළ යුතු රෙගුලාසි (EUDR) හඳුන්වා දී ඇති අතර එහි ප්‍රධානතම අවශ්‍යතාවයක් ලෙස රබර් සැපයුම් දාමයන් වනාන්තර විනාශයට දායක නොවන බව සහතික කිරීම සඳහා වගා කරන ප්‍රදේශ නිවැරදිව සිතියම්ගත කිරීම අවශ්‍ය වේ.

ගෝලීය වශයෙන් වන විනාශය සහ වන විනාශයට සම්බන්ධ නිෂ්පාදන ආනයනය සහ අපනයනය වැළැක්වීම අරමුණු කර ගනිමින් යුරෝපා සංගමය මෙම නියෝගය පනවා ඇත.