(අංජුල මහික වීරරත්න)

බණ්ඩාරනායක ජාත්‍යන්තර  රාජ්‍යතාන්ත්‍රික පුහුණු ආයතනය සහ බ්‍රසීල ෆෙඩරේටිව් ජන රජයේ විදේශ කටයුතු අමාත්‍යාංශයේ රියෝ බ්‍රැන්කෝ ආයතනය අතර සහයෝගීතාව පිළිබඳ අවබෝධතා ගිවිසුම අත්සන් කිරීම සඳහා කැබිනට් අනුමැතිය ලැබී ඇත.

විදේශ කටයුතු, විදේශ රැකියා සහ සංචාරක අමාත්‍යාංශය යටතේ පවතින බණ්ඩාරනායක ජාත්‍යන්තර රාජ්‍ය තාන්ත්‍රික පුහුණු ආයතනය සහ බ්‍රසීල ෆෙඩරේටිව් ජන රජයේ විදේශ කටයුතු අමාත්‍යාංශය යටතේ පවතින රියෝ බ්‍රැන්කෝ ආයතනය අතර සහයෝගීතාව පිළිබඳ අවබෝධතා ගිවිසුමක් අත්සන් තැබීම පිණිස 2024-09-02 දින පැවති අමාත්‍ය මණ්ඩල රැස්වීමේදී අනුමැතිය ලබා දී ඇති නමුත්, මෙතෙක් එකී ගිවිසුමට අත්සන් තබා නොමැත.

 ජාත්‍යන්තරව කීර්තිමත් රාජ්‍යතාන්ත්‍රික ඇකඩමියක් වශයෙන් රියෝ බ්‍රැන්කෝ ආයතනය දශක 8 ක් පුරා ලෝකයේ රටවල් 57 ක පමණ රාජ්‍ය තාන්ත්‍රිකයින් පුහුණු කිරීමට දායක වී ඇති අතර, රටවල් 70කට වැඩි සංඛ්‍යාවක් සමඟ සහයෝගිතා ගිවිසුම් වලට එළඹ තිබේ.

රාජ්‍ය තාන්ත්‍රිකයින් පුහුණු කිරීම හා පුහුණු වැඩසටහන් සඳහා ඔවුන්ට අවශ්‍ය පහසුකම් සැලසීම, ඔවුන්ගේ අධ්‍යයන හා පර්යේෂණ වැඩසටහන් පිළිබඳ තොරතුරු හා අත්දැකීම් හුවමාරු කර ගැනීම, විද්‍යුත් ඉගෙනීමට අදාළ මෙවලම් සහ ජාතික මෙන්ම ජාත්‍යන්තර ප්‍රකාශන පිළිබඳ තොරතුරු හුවමාරු කර ගැනීම සහ විශේෂයෙන් අන්‍යෝන්‍ය වශයෙන් උනන්දුවක් දක්වන ක්ෂේත්‍ර වල සමීප සහයෝගිතාව ප්‍රවර්ධනය කිරීම යෝජිත අවබෝධතා ගිවිසුම මඟින් අපේක්ෂා කරනු ලබයි.

 ඒ අනුව, යෝජිත අවබෝධතා ගිවිසුමට අත්සන් තැබීම පිණිස විදේශ කටයුතු, විදේශ රැකියා සහ සංචාරක අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.