(පුෂ්පකුමාර ජයරත්න )
 
සිසුසැරිය බසයක් සහ ඇඟළුම් කම්හලක සේවකයින් ප්‍රවාහනය කරන බසයක් අද  (07) ⁣උදෑසන කුරුණෑගල දඹුල්ල මාර්ගයේ ඉබ්බාගමුව පාන්ගොල්ල මංසන්ධියේදී ගැටීමෙන් වූ අනතුරකින් සිසුසිසුවියන් 15 කට ආසන්න පිරිසක් තුවාල ලබා ඇතැයි ගොකරැල්ල පොලිසිය කියයි.
 
තුවාල ලැබූ සිසුන්ද, ඇඟළුම් කම්හල් බසයේ රියැදුරාද කුරුණෑගල ශික්ෂණ රෝහලට සහ ගොකරැල්ල දිසා රෝහලට ප්‍රතිකාර සඳහා ඇතුළත් කර ඇති අතර ඔවුන්ගේ තත්ත්වය බරපතල නොවන බව පැවසේ.
 
 මැල්සිරිපුර දිද්දෙනියේ සිට ඉබ්බාගමුව මධ්‍ය විද්‍යාලයට සිසුන් ප්‍රවාහනය කරන සිසුසැරිය බසයක් මෙලෙස අනතුරට ලක්ව ඇත.
 
 අනතුර සිදුවන අවස්ථාවේ එම බසයේ සිසුවියන් 80 කට ආසන්න සංඛ්‍යාවක් ගමන් කරමින් සිට ඇත. තුවාල ලැබූ සිසුන්ගෙන් වැඩි පිරිසක් සාමාන්‍ය පෙළ සහ උසස් පෙළ ඉගෙනුම ලබන දරුවන් බව ගොකරැල්ල පොලිසිය කියයි.
 
 ඉබ්බාගමුව ප්‍රදේශයේ ඇඟඵම් කම්හලක සේවක පිරිසක් ප්‍රවාහනය කර ආපසු යමින් සිටියදී ඇඟළුම් කම්හලේ බසය අනතුරට ලක්වී ඇත.
   
ඇඟළුම් කම්හලේ බසයට දැඩි හානි සිදුව ඇති අතර සිසුසැරිය බසය මාර්ගය අසළවූ කුඹුරකට පෙරළි ගොස් ඇත.
   
සිසුසැරිය බසයේ රියැදුරාගේ නොසැලකිලිමත් රිය ධාවනය අනතුරට හේතුව බව පොලිස් පරීක්ෂණ⁣ වලදී අනාවරණය වී ඇත.
 
 සිසුසැරිය බසයේ රියැදුරා ගොකරැල්ල පොලීසිය විසින් සැකපිට අත්අඩංගුවට ගෙන ඇත.ගොකරැල්ල පොලීසිය අනතුර සම්බන්ධයෙන් වැඩිදුර පරීක්ෂණ මෙහෙයවයි.