(රෝෂන් තුෂාර)

රුපියල් කෝටි 200ක් පමණ වීදි වටිනාකමක් ඇති මත්කුඩු සමග දකුණු මුහුදු තීරයේදී අත්අඩංගුවට ගත් ධීවරයන් පස් දෙනා  ලබන 6 වැනි දා තෙක් රිමාන්ඩ් බාරයේ තබන්නැයි  කොළඹ අතිරේක මහේස්ත්‍රාත් මිගාර මහාරච්චි මහතා අද නියෝග කළේය.

හෙරොයින් කිලෝග්‍රෑම් 21ක් සහ අයිස් කිලෝග්‍රෑම් 172ක් සමග අත්අඩංගුවට ගත් ධීවරයන් පස් දෙනාට මත්ද්‍රව්‍ය තොගේ ලබා දුන්නේ යැයි කියන ඩුබායිහී සැඟව සිටින අකිල සෙහාන් සහ ගන්දර පදිංචි සපුන් ටෙලාන් නමැති පුද්ගලයන් සැකකරුවන් ලෙස නම් කර ඉදිරියේදී අත්අඩංගුවට ගෙන අධිකරණයට ඉදිරිපත් කරන බව පොලිසිය අධිකරණයට වැඩිදුරටත් පැවසීය.

අත්අඩංගුවට ගැනීමෙන් අනතුරුව දින හතක් මත්ද්‍රව්‍ය කාර්යාංශයේ රඳවා ප්‍රශ්න කළ නවෝත්, පුබුදු ,අදීශ ,ලක්ෂිත අවිශ්ක සහ සත්සර සැකකරුවන් අධිකරණයට ඉදිරිපත් කළ පොලිසිය විමර්ශන අවසන් නොමැති බැවින් සැකකරුවන් තවදුරටත් රක්‍ෂිත බන්ධනාගාරගත කරන ලෙසට ඉල්ලා සිටියේය.

මත්ද්‍රව්‍ය ආනයනය කිරීම ජාවාරම් කිරීම හා සන්තකයේ තබා ගැනීම යන චෝදනා යටතේ සැකකරුවන් අධිකරණයට ඉදිරිපත් කෙරිණි.

ගන්දර ප්‍රදේශයෙන් පසුගිය 09වනදා මුහුදු ගිය සැකකරුවන් පස් දෙනා පොරඋර 11ක බහාලු මත්ද්‍රව්‍ය තොගය සමග පසුගිය 23 දින දකුණු මුහුදු තීරයේදී නාවික හමුදාව  අත්අඩංගුවට ගත් බව පැවසූ පොලිසිය සැකකරුවන් රඳවා ප්‍රශ්න කිරීමෙන් අනතුරුව ඩුබායි රටේ සැඟව සිටින පුද්ගලයා ගැන හා ගන්දර ප්‍රදේශයේ සැකකරු ගැන තොරතුරු අනාවරණය වූ බව සඳහන් කළේය. ඉදිරිපත් කළ කරුණු සලකා බැලූ අතිරේක මහේස්ත්‍රාත්වරයා සැකකරුවන් ලබන 06 දින දක්වා රක්ෂිත බන්ධනාගාර ගත කරමින් එදිනට විමර්ශන ප්‍රගතිය අධිකරණයට ඉදිරිපත් කරන ලෙසට නියෝග කළේය.