උතුරු කොරියාවේ, ‘රොඩොංග් සිංමුන්’ ජාතික පුවත්පත, දකුණු කොරියානුවන්ට කියවීමට දකුණු කොරියානු ජනාධිපති ලී ජෙයි මයුංග් පරිපාලනය තීරණය කර ඇත. 

ඒ අනුව, දශක ගණනක් තිස්සේ ‘රොඩොංග් සිංමුන්’ පුවත්පත දකුණු කොරියාවේ තහනම් කරමින් පැවැති නීතිය අවලංගු වන බව ද පැවැසෙයි.

කොරියාව යනු එකම ජාතියක් වෙසෙන රටවල් දෙකකි. කොරියාව උතුරු කොරියාව සහ දකුණු කොරියාව යන නමින් දෙකඩ වී විරසකයක් නිර්මානය වී ඇත්තේ කොරියානු යුද්ධයෙනි. 

දකුණු කොරියාව තවමත් නිල වශයෙන් සිය න්‍යෂ්ටික අවි දරණ අසල්වැසියා සමඟ යුදමය තත්ත්වයක පසුවෙයි. දෙරට අතරේ ඕනෑම මොහොතක යුදමය තත්ත්වයක් ඇවිලිය හැකි බව දේශපාලන විශ්ලේෂකන්ගේ අදහසය. දෙරට අතරේ ඇත්තේ, කටවචනයෙන් ඇති කරගත් එකඟතාවක් පමණි. 

කොරියානු යුද්ධයෙන් පසු උතුරු කොරියාව, රුසියාව සහ චීනයටත්, දකුණු කොරියාව ඇමෙරිකාවටත් ළං විය. 

‘රොඩොංග් සිංමුන්’ පුවත්පත දශක ගණනාවක් තිස්සේ තහනම් කිරීමට දකුණු කොරියාව තීරණය කර ඇත්තේ, එහි ඇති දකුණු කොරියා විරෝධී ආකල්ප නිසාය. කෙසේ නමුත්, දකුණු කොරියා ජනාධිපති ලී ජෙයි මයුංග් සාමකාමී ප්‍රතිපත්තියක් අනුගමනය කරන නායකයෙකි. ඔහු උත්සාහ ගනිමින් සිටින්නේ උතුරු කොරියාව සමඟ පවතින එදිරිවාදිකම් අවසන් කිරීමටය.

‘රොඩොංග් සිංමුන් පුවත්පතේ පළ වන්නේ උතුරු කොරියානු නායක කිම් ජොන් උන්ගේ මතවාද. ඒවා කුමක් වුවත්, ද්වේශසහගත වුවත්, බුද්ධිමත්ව ඒවා කියවා ඇත්ත නැත්ත තේරුම් ගන්න දකුණු කොරියානුවන් පරිණත වී සිටිනවා. ඒනිසා තවදුරටත් රොඩොංග් සිංමුන පුවත්පත තහනම් කිරීමෙන් ඵලක් වේවි යැයි මා විශ්වාස කරන්නේ නැහැ. ඒ නිසා දකුණු කොරියානුවන්ට රොඩොංග් සිංමුන් පුවත්පත පරිශීලනයට අප ඉඩ ලබා දෙනවා’ යැයි ජනාධිපති ලී ජෙයි මයුංග් මාධ්‍ය හමුවේ පැහැදිලි කර ඇත.