(සුජිත් හේවාජුලිගේ සහ ජේ.කේ.එල් චාමින්ද)

අමාත්‍ය නිල නිවාසවලට  ලබාදී ඇති  ජල සම්බන්ධතා විසි තුනකට අදාලව  රුපියල් ලක්ෂ  50 කට අාසන්න මුදලක් ගිය වසර අවසානය වනවිටත්  අයකර නොගෙන  හිඟව පැවතුණු බව ජාතික විගණන කාර්යාලය  නිකුත් කළ වාර්තාවක සඳහන් වේ.

මේ අතර  මියගිය මහජන නියෝජිතයින්ගෙන් අය විය යුතු හිඟ ජල ගාස්තු  අය කරගැනීමට නොහැකි බවට  පාර්ලිමේන්තු මහ ලේකම්වරිය දන්වා ඇතැයිද එම වාර්තාවේ දැක්වේ.

මේ හිග මුදල්  සම්බන්ධයෙන් විගණනයට  පිළිතුරු දක්වා ඇති  ජල සම්පාදන  හා ජලා පවාහන මණ්ඩලය  පවසන්නේ  මහජන නියෝජිතයන්ගේ පෞද්ගලික නිවාසවල  හිග මුදල්   සාමාන්‍ය පරිභෝගිකයන්  ලෙස සලකා අය කර ගන්නා බවයි.

හිඟ මුදල් නොගෙවන  ස්ථානවල ජල සැපයුම විසන්ධි කරන ලෙස වාණිජ නිලධාරීන්ට උපදෙස් දී ඇතැයි මණ්ඩලය සඳහන් කළ  බවද   එම වාර්තාවේ දැක්වේ.

මහජන නියෝජිතයන්ගෙන් අය විය යුතු හිග  මුදල අය කරගැනීමට ප්‍රමාණවත් හා අවශ්‍ය ක්‍රියාමාර්ග ගන්නා ලෙසට  විගණන අංශ ජල සම්පත් හා ජලා පවාහන මණ්ඩලයට  නිර්දේශ කර ඇත.

තවද වෙළෙඳ ණය ගැතියන්,  නව සම්බන්ධතා ණයගැතියන්,  ජල ප්‍රවාහන ණය ගැතියන් සහ අනෙකුත් ණයගැතියන්ගෙන්  කෝටි 234  ක පමණ මුදලක්  වසර දෙකකට වැඩි කාලයක් තිස්සේ අයකර ගැනීමකින් තොරව හිගව  පැවතුණ බවද  එම වාර්තාවේ  සඳහන්වේ.

ඉහත වෙළඳ ණය  ගැතියන්ගෙන් සියයට හැට හයක් බස්නාහිර මධ්‍යම බස්නාහිර උතුර සහ බස්නාහිර දකුණ උපදේශ නියෝජනය කරති . නව  සම්බන්ධතා ණයගැතියන්ගෙන් මාස තුනක් ඇතුළත වාරික තුනකින් ණය කර ගැනීමට නියමිතව තිබුණද රුපියල් කෝටි තුනකට වැඩි මුදලක් වසර තුනකට වඩා වැඩි කාලයක් තිස්සේ අය කර ගැනීමකින් තොරව පැවතුණ බව වාර්තාවේ දැක්වේ.

මේ සම්බන්ධයෙන් කරුණු දක්වන මණ්ඩලය පවසන්නේ  හිඟ මුදල් එසේ ක්‍රමිකව වර්ධනය වූ බවයි.

එම හිඟ මුදල් අය කර ගැනීමට කටයුතු කරගෙන යන බවද මණ්ඩලය සඳහන් කළේය.

හිඟ ශේෂයන් වහා අය කර ගැනීමට කටයුතු කරන්නැයි  විගණන අංශ මණ්ඩලයට තවදුරටත් නිර්දේශ කර ඇත.