වර්තමානයේ සංගීත ක්ෂේත්‍රයට එක්වෙන නවක ගායක ගායිකාවන් අතරේ අමල්ක සෙනෙවිරත්නට හිමිවන්නේ සුවිශේෂිත තැනකි. දැනට ගීත කිහිපයක් එළිදක්වා ඇති ඔහු සිය අලුත්ම ගීතය වන "මේ හීනේ" ගීතය සහ ඊට රූප රචනයක් පසුගියදා එළිදක්වනු ලැබීය. මීට වසර කිහිපයකට පෙර සිට සංගීත ක්ෂේත්‍රයට එක්වූ අමල්ක, මේ වනවිට ගීත කිහිපයක් එළිදක්වා තිබේ. එහෙත්, ඔහුගේ කුලුඳුල් මියුසික් වීඩියෝව වන්නේ "මේ හීනේ" ගීතයයි.

"මේ හීනේ" ගීතය අද රැල්ලට නිර්මාණය වුණ ගීතයක් නෙමෙයි. ඒ ගීතය සහ වීඩියෝව පුරාවටම තියෙන්නෙ ආදරය පමණයි. ඇත්තටම, අද කාලෙ ගීත අතරින් "මේ හීනේ" වෙනස්ම ගීතයක් කියලා සඳහන් කරන්න පුළුවන්. මෙහි ඇති වෙනස නිසාම "මේ හීනේ" ගීතය කෙටි කාලයකින්ම බොහෝ පිරිසක් අතර ජනප්‍රිය වුණා. මෙහි පද රචනය සිදු කළේ මේනක තරංග ප්‍රේමචන්ද්‍ර, සංගීතවත් කළේ සංජුල හිමාල. තිර පිටපත් රචනා කරමින් මෙහි මියුසික් වීඩියෝව මමම නිර්මාණය කළා. කැමරාකරණයෙන් දුමිත් ගයන්ත පතිරණ සහය වුණා. මියුසික් වීඩියෝවේ නිෂ්පාදන කටයුතු සිදු කළේ මගේ සහෝදර සංජීව ජයසිංහ. රංගනයෙන් පැතුම් රුක්ෂාන් සහ ඉරේෂා අසන්කි මා සමගින් දායක වුණා."