(අංජුල මහික වීරරත්න,ජේ එල් ඒ ජයසිංහ සහ ෂේන් සෙනවිරත්න)

පාර්ලිමේන්තු මැතිවරණයෙන් ජයග්‍රහණය ලබා රට ගොඩ නගන්නට ජනපති ඇතුළු කණ්ඩායමට ශක්තිය ලැබේවායි ප්‍රාර්ථනා කරන බව ආනමඩුවේ ධම්මදස්සි අස්ගිරි අනු නා හිමියෝ අග්‍රාමාත්‍ය හරිනි අමරසූරිය මෙනවිය හමුවේ අද ( 28) පැවසූහ.

පැවතුණ රාජ්‍ය තන්ත්‍රවල දොස් සෙවීමට වඩා පැවරුණු වගකීම ජනතාව බලාපොරොත්තු වූ ආකාරයට හොඳින් ක්‍රියාත්මක කළ යුතුව තිබෙන්නේ යැයිද අනුනාහිමියෝ කීහ.

අග්‍රාමාත්‍ය හරිනි අමරසූරිය මෙනවිය අද මහනුවරට පැමිණ ශ්‍රී දළදා වහන්සේ වන්දනා කිරීමෙන් අනතුරුව අස්ගිරි මල්වතු මහා නා හිමිවරුන් බැහැ දැක ආශිර්වාද ලබා ගත්තේය.

එහිදී අනුශාසනාවක් කළ ආනමඩුවේ ධම්මදස්සි අස්ගිරි අනු නාහිමියෝ මෙසේද පැවසූහ.

ජනපති ඔබ ඇතුළු කණ්ඩායමට ප්‍රජාතන්ත්‍රවාදී ක්‍රමයට අනුව මහජන ඡන්ද බලයෙන් ලංකාවේ වගකීම පැවරී තිබෙනවා.මේ රට සංස්කෘතික හා ජාතික අනන්‍යතා වලින් යුක්ත රටක්.එමෙන්ම අතීත හර පද්ධතියන්ගෙන් යුක්ත රටක්.

පුරවැසියන්ගේ ආර්ථිකය වර්ධනය කිරීමට මෙන්ම දේශයට ප්‍රිය කරන ජනතාවක් බිහි කරන්න ඔබ ඇතුළු රජයට යුතුකමක් පැවරී තිබෙනවා. ඔබ දැන උගත් ශ්‍රේෂ්ඨ කාන්තාවක්.දැන උගත් අයට නිලතල ලබාදීම ජනපති දැන් ආරම්භ කර තිබෙන බව පෙනෙනවා.

පැවතුන රාජ්‍ය තන්ත්‍රවල දොස් සෙවීමට වඩා පැවරුණු වගකීම ජනතාව බලාපොරොත්තු වූ ආකාරයට හොඳින් ක්‍රියාත්මක කළ යුතුයි.මේ රටේ හර පද්ධතිය සමග ඒකාබද්ධව කටයුතු කරමින් රට සමෘද්ධිමත් කළ යුතුව තිබෙනවා.